Bi britainiarrek Malagan egin dute elkar ikusteko hitzordua, merkeago ateratzen zitzaielako

Atalak: Garraioa

Newcastle-koa bata eta 320 kilometrora dagoen Birmingham-ekoa bestea, hiri batetik bestera bidaiatzea trenez 120 euro inguru kostatzen zitzaiela ikusi zuten eta alternatiba bat aurkitu zuten: hitzordua Malagan egitea, Ryanair konpainiarekin joan-etorria 23 eurotan ateratzen zitzaiolako batari eta 62 eurotan besteari. Alegia, bi billeteak batuta ere, treneko bakarra baino 35 euro merkeago.

Supermerkatuan kontsumitzen ditugun produktuek milaka kilometro egiten dituzte munduan barna, alferrik. Hori da kapitalismoaren logika absurdu eta batere jasangarria. Produktuei buruz ez, 320 kilometro beharrean kasik 2.000 egin dituzten bi lagunez ari gara oraingoan, hegaldi oso merkeen pagotxa aprobetxatuta.

Planetarentzat, oso garestia: 2.247 kilo CO2

Zer da merkea eta zer garestia? Neurtzen dugunaren arabera: Eneko Fernandezek bidali digun artikulu honetan ongi azaltzen denez, garraiobideek kutsatzen dutena aintzat hartuko bagenu trena baino askoz garestiagoa da hegazkina, baina ingurumen kostua ez da billetean islatzen. Hala, bi britainiar Malagan geratzearen kostua da airera 2.247 kilo CO2 isurtzea, eta trenean hiri batetik bestera mugitzearena berriz, 9 kilo CO2 isurtzea, trenak erregai gutxiago kontsumitzen duelako eta bidaiari gehiago eramaten dituelako. Hegazkina kaltegarria da planetarentzat, azpimarratzen du artikuluak.

Lucy eta Zara urtarrilaren 7an iritsi ziren Andaluziara, hiru egun pasa zituzten Malaga eta Granadan, eta dena oso merkea iruditu zaiela azpimarratu dute: lo egiteko lekuak, edariarekin batera doan eman dizkieten tapak… Albisteak eztabaida piztu du Britainia Handian, tren zerbitzuek dituzten prezio garestiak hizpide.