Irakasleak fokupean

Atalak: Hezkuntza

PISA azterketak EAEn utzi dituen emaitza kaskarren ardurak hizpide, fokua irakasleengan jarri du Cristina Uriarte Hezkuntza sailburuak. Nik maisu-maistra asko ditut gogoan, ikasle garaitik: zorrotzagoak batzuk, enpatikoagoak besteak; ikasle denek ulertu arte azalpenak errepikatzen eta modu ezberdinetan ematen zituztenak, eta gaitegi osoa eman nahian erritmoa apaltzeko astirik ez zutenak; lanorduz kanpo klase originalak prestatzen saiatzen zirenak, eta curriculuma estu jarraitzen zutenak; ikasle bakoitzaren eboluzioa gertutik ezagutzen zutenak, eta ordezkapen sistemak ikastetxe batetik bestera dantzan zituen irakasleak; pedagogia berritzailez eta ilusioz beterik iristen zirenak, hamaika ikastaro eta mintegitan parte hartutakoak, eta pixkanaka ilusio hori galtzen joaten zirenak… Ikasleen jakin-mina eta motibazioa loratzeko giroa eta testuingurua funtsezkoa dela diogun moduan, irakasleen motibazioa eta ilusioa ez kamusteko ere ez al da oinarrizkoa eskaintzen zaion giroa, egunerokoan aurkitzen dituen baldintzak? Ikasgela gero eta masifikatuagoak, curriculum amaigabeak, lege eta plangintza aldaketak, autonomiarako tarte txikia uzten duen sistema zurruna… ez dira giro onena. Uriartek esan die irakasleei akademizismoan eta esposizioan oinarritutako hezkuntza alboratu behar dutela, eta aldi berean PISA eta enparauen moduko ebaluazio guztiz akademizistak jartzen dira hezkuntza sistemaren abiapuntu eta helburu, irakaskuntza baldintzatuz. Panorama honetan, etengabe zirrikituak bilatzen eta ikasle bakoitzaren onena ateratzen ahalegintzen diren irakasleak ez dira gutxi. Piztu dezatela fokua horiek nabarmentzeko.