Pintada arrazistak egin dituzten nerabeei epaileak agindutako kondena: irakurtzea

Atalak: Arrazakeria, Diskriminazioa

16-17 urteko bost lagunek esbastika bat eta mezu arrazista pare bat margotu zituzten afroamerikarrentzako eskola izandako eraikin zahar batean. Epaituak izan dira, besteak beste gazteek adierazi dute esbastikak zehazki zer esan nahi duen ez dakitela, eta fiskalari iruditu zaio akusatuek behar dutena dela “begiak irekitzea, ikusteko jendeak nolako gauza beldurgarriak egin dituen arrazaren, generoaren edota erlijioaren izenean”, eta irakurtzera kondenatu ditu: 12 liburu guztira, hilero bat, ondo pentsatutako 35 liburuko zerrenda batetik aukeratuak.

“Purpura kolorea” da zerrendan aukeratzeko duten liburuetako bat.

Gazte estatubatuar hauen ekintzak bandalismo hutsetik eta arduragabekeriatik gehiago duela dio fiskalak, gorroto delitutik baino. Horregatik eta txikitan irakurtzeak mundua hobeto ulertzeko balio izan ziolako egin du eskaera fiskalak (haurra zenean, ama liburuzaina zuen), eta epaileak bat egin du eskaerarekin. Purpura kolorea, Exodus, Salemgo sorginak… moduko liburuak dituzte aukeratzeko, beltzen esklabotza, kontzentrazio esparruak eta beste hainbat diskriminazio jorratzen dituztenak. Liburu bakoitza irakurri ostean, lan bat egin beharko dute gazteek.

14 pelikula, 2 museo eta eskola afroamerikarreko ikasle ohiarekin solasaldia

Liburuez gain, 14 pelikula ere ikusi beharko dituzte gazteek (tartean, Shindler’s List, 12 urtez esklabo, Lincoln…), Holokaustoaren Museoa eta Amerikako Historiarena bisitatu beharko dituzte eta garai batean afroamerikarrentzako eskola izandakoaren ikasle-ohi baten lekukotza eta kontakizuna entzungo dute. Horrekin guztiarekin, gorrotoaren diskurtsoari buruzko ikerketa lan bat idatzi beharko dute.

Erabakia zentzuzkoa eta baliagarria izango dela uste dute, baita ere, gazteen abokatuek eta sasoi batean jasandako segregazioaren oroigarri moduan eskola afroamerikarra zaharberritzen ari den taldeak.