Ikasleen esperimentu arrakastatsua: jaso duzu Nicoren mezua?
Niri asteazkenean iritsi zait mezua, whatsapp bidez: “Lagundu iezadazu munduari itzulia ematen. Nico naiz” (ikusi irudia). Ziztu bizian zabaldu da astearte goizean Madrilgo ikastetxe batean abiaturiko esperimentua: helburua, ohartzea irudiak zeinen azkar hedatzen diren, inongo kontrolik gabe.
Frantzia, Hungaria, AEB, Venezuela… bisitatu ditu dagoeneko Nicoren mezuak. 14-15 urteko gazteei proposatu zien proiektua irakasleak eta whatsapp, Facebook, Twitter eta Instagramez bidali dute irudia. Batzuetan, azalpen batek lagunduta joan da mezua: “DBH3ko esperimentua da hau, irudiak zeinen azkar zabaltzen diren frogatzeko”.
“Mezu konprometigarriagoa balitz munduan barna dabilena?”
Irakasleak kontatu duenez, whatsapp bidez zabaldu da gehien, eta harrituta daude emaitzarekin, urrutira eta jende askorengana iritsi dela jakin baitute. “Helburua da ikasleek ikustea sare sozialetan argitaratzen dutena kontrolatzea inportantea dela eta euren ekintzek ondorioak dituztela. 24 ordutan munduan zehar bidaiatu du Nicok, baina Nicoren ordez irudi edo mezu konprometigarriagoa balitz munduan barna dabilena?”. Sare sozialetan arduraz jokatu behar dela, alegia.
Iritsi zait, behin baino gehiagotan.