Ausarten Kluba, bullyingari aurre egiteko

Atalak: bullyinga

Jazarpen kasuak azaleratu eta konponbidea aurkitu ahal izateko, ikaslez osaturiko Ausarten Kluba sortu dute Terrassako ikastetxe batean: “Ausarta eta salataria ezberdindu behar dira: salataria da sekretu bat gordetzen ez dakiena, baina sekretu horren erruz norbait sufritzen ari bada, kontatzea da laguntzeko modua”, diote 10 urteko Sanaa eta Antoniok.

“Benetako ausartek biktima defendatzen dute”

Isiltasuna apurtzearen garrantzia, laguntasuna, enpatia, erasotzailearen aurrean taldeak duen indarra… lantzen dituzte ikastetxean, eta balore horien arabera kritikoak eta aktiboak dira ikasleak eurak: “Benetako ausartek biktima defendatzen dute eta ez dira erasotzailearen konplize” (Rachida eta Orlando, 12 urte); “ausartak dira elkarri laguntzen diotenak, ez dutenak jotzen ez iraintzen” (Wisal, 4 urte); “erasotzailea aldatzen bada eta ausart bihurtzea erabakitzen badu, beste aukera bat ematen diogu” (Francisco, 11 urte).

Elkarbizitzaren Batzorde Mistoa ere badute ikastetxean, ikasle, guraso eta eskolako langileek osatua. Denak ongi egoteaz arduratzen dira, bai ikastetxean, eta batzuetan baita ikastetxetik kanpo ere.