Eskizofreniari aurre egiteko haluzinazioak marrazki bihurtzen dituen gaztea

Atalak: Artea, Osasuna

Kate du izena, 18 urte ditu eta iaz eskizofrenia diagnostikatu zioten. Ordura arte, ez zuen gertatzen zitzaiona ulertzen eta depresio uneak sarriak ziren. Orain, erabaki du entzuten dituen ahots eta ikusten dituen irudi irrealak margotzea. Eskizofreniak duen estigma apurtzeko eta batez ere hari aurre egiteko terapia eraginkorrena izaten ari da.

“Gaixo mental” etiketa gorroto du, baina bere kasua kontatzen duenean, jendeak gaixo mental bat bakarrik ikusten duela dio. Katek ez du bere egoera ezkutatzen, sarean zabaltzen ditu haluzinazioek iradokitako marrazkiak, eta beretzat onuragarria izateaz gain, lortzen ari da gainerakoek hobeto ulertzea eta eskizofrenia dutenei helaraztea terapia lagungarria izan daitekeela.

Ahotsak eta soinu arraroak entzuten ditu Katek, eta intsektuak, zomorroak, aurpegiak, begiak… ikusten ditu, baita beste zerbait bihurtzen diren objektu errealak ere [ikusi behean marrazkietako batzuk].

“Sormenetik abiatuta berreskuratu daiteke gizartearekiko lotura”

Buenos Airesko zentro terapeutikoan, sormena eta espresioa bereziki lantzen dutela kontatu zigun Lucía Gricman psikologoak, “eromenak lotura soziala galtzera eraman zaitzakeelako eta sormenetik abiatuta berreskuratu daitekeelako gizartearekiko lotura. Buruan gertatzen den gauza hain berezi hori (batzuk gaixotzera daramatzana), hain zurea den hori plano kolektibora eramateko modua da sormena, besteei zure ekarpena egiteko modua”.

“Agian haien edertasuna lapurtzen badut, neure edertasun propioa izango dut”.