Zer egin bortxatzen bazaituzte

Atalak: Indarkeria matxista

Bortxatzen bazaituzte ikuspegi juridikotik Espainiako Estatuan eman beharreko pauso zehatzak aholkatu ditu José Dominante abokatuak: “Hasteko, ez joan poliziarenera. Zoritxarrez, ez dago bermatua poliziak ezagutza juridiko-forentseak izango dituenik. Ospitalera joan, larrialdietara, arropa aldatu gabe (ADNa izan dezakezu arropan ere) eta garbitu gabe. Desatsegina da, bai, baina frogak biltzeko balio dezake. Larrialdietan badakite zer egin, eta hondoa jotzen baduzu ere badaukate nork artatu. Ez du axola ez badago erasoaren “ageriko” biolentzia-frogarik, biktimaren deklarazio hutsa biktimaren aldeko nahikoa froga izan daiteke (2000/3/10eko Auzitegi Gorenaren ebazpena). Lekukotzak hiru baldintza bete behar ditu nahikoa froga izan dadin: erasotzailearen eta biktimaren artean aurretiazko erresuminik ez egotea; lekukotza sinesgarria izatea (ingurukoen berrespenak lagunduta); biktimak lekukotzari eustea bere deklarazio guztietan. Ospitaleak salaketa bidaliko du segituan Guardiako Epaitegira (lesioen partea) eta makinaria judiziala martxan jarriko da. Noiz joan poliziara? Beste pertsona bat joan dadila, erasotzailearen daturik badu, biktima ospitalean artatzen duten bitartean, eta gomendagarria da ondoren ospitaleko dokumentazioaren kopia eramatea Poliziari. Tristea da bortxaketaren biktimei zer egin azaldu beharra, erasotzaile puta-semeei azaldu ordez, hasteko, ez dutela halakorik egin behar”.

Noiz ematen da delitu sexuala?

Sexu-askatasunaren aurkako delituak zeintzuk diren ere azaldu du Dominantek, Espainiako Zigor Kodearen arabera: “Bortxaketa da biolentziaz edo beldurraraziz sarketa praktikatzea ahoan, baginan edo uzkian, edo zakila ez beste zerbaitekin sarketa praktikatzea bagina edo uzkian. Ez badago sarketarik, baina bai biolentzia edo beldurraraztea, eraso sexuala da. Biolentziarik edo beldurrarazterik eman ez arren, biktimaren baimenik eta onespenik ez badago, sexu abusua da. 16 urtez azpikoekin egiten den edozein sexu-praktika delitua da”.