“Oso garrantzitsua da onartuak garela sentitzeko aukera ematea migratzaile guztioi”

Atalak: Errefuxiatuak

“Herrialde berri batera iristen zarenean, ez daukazu herrialde horretako ezagutza kultural eta historiko sakonik, eta sarri gai garrantzitsuetan hanka sartzen duzu. Gizartearen konplexutasuna azaldu eta bertan barneratzen lagundu didan jendea izan dut inguruan eta hori zortea izan da, errefuxiatu askok ez duelako aukera hori –dio Yahia Kodook, Siriatik Gasteiza duela bost urte iritsia–. Oso garrantzitsua da migratzaile guztiei aukera hori ematea, onartua dela sentitzeko eta itxaropentsu eta baikor integratzeko gizarte berri horretan”.

Euskal Herrian dauden bi errefuxiatuk euren esperientzia kontatu dute EHUn, Ongi Etorri Errefuxiatuak plataformak eta Steilas sindikatuak antolatuta. Yahia Kodoo Literatura doktoretza ari da egiten EHUn: “Nik neuk nituen aurreiritziak apurtzen lagundu zidaten ingurukoek. Manifestazio xenofoboak izan direnetan, adibidez, horien kontra bildu den jendea gehiago izan da, eta horrek ulertarazi dit ez dagoela ikuspegi bakarra, denek ez dietela etorkinei leporatzen gauza txar guztien errua”.

“Ikasleek galdetzen didate: nola lagundu dezakegu?”

“Instituzioen pasibitatearen aurrean, ikasle mugimendutik-eta galdetzen didate, zer egin dezakegu? Nola lagundu dezakegu? Baina nik ez dakit zer erantzun, ni bat gehiago baino ez naiz eta Gobernuz Kanpoko Erakundeen eta administrazioaren inplikazioa beharrezkoa da. Hala ere, herritarrek eurek bultzatuta ekimenak atera dira aurrera eta eskertzekoa da: jende asko Turkiara eta Greziara joan da errefuxiatuak laguntzera”.

“Sirian agintzen dutenak ez dira siriarrak, nazioarteko erakundeak baizik”

“Albisteek harritzen naute: beti bi bando agertzen dira, erregimen siriarra eta Estatu Islamikoko terroristak. Min ematen dit, ez delako hitz egiten hain juxtu gehiengoa den beste zatiaz: siriar herriaz, biktima den horretaz, dena utzi eta handik ihes egitera behartuak. Albisteen arabera, diktaduraren eta terroristen artean baino ezin dugu aukeratu, siriar erregimena beste alternatibarik egongo ez balitz bezala hitz egiten da, baina siriar herriak aldaketa eta demokrazia nahi du. Gertatzen ari denak argi uzten du Sirian agintzen dutenak ez direla siriarrak, nazioarteko erakundeak baizik”.

Hassanna Aalia: “Noizbait gure herrialdera itzultzeko ametsa dugu”

Hassanna Aalia errefuxiatu sahararrak hartu du hitza ondoren. Bilbon bizi da, duela sei urtetik, “baina noizbait gure herrialdera itzultzeko ametsa dugu errefuxiatuok, gure herri, etxe eta familiekin itzultzeko nahia”.

Kritikoa da Aalia: “Berdin dio siriarra edo sahararra izan, oinarria da errefuxiatuak garela, gatazka batzuen erdian bizitzea egokitu zaigula, eta gakoa da: zein da gatazka horien erantzule? Zeinek saltzen dizkie armak talde terroristei eta herrialde horiei? Bestalde, mingarria da hainbeste sufrimendu eta hainbeste heriotza gertatu behar izatea, hedabideek eta erakundeek migratzaileez hitz egin dezaten, errefuxiatuena urte asko dituen errealitatea denean: begira Palestina edo Sahara, 41 urtez kanpamentu batean. Bizirautea beste erremediorik ez dugu”.

“15 egunetan Espainiako Estatua uzteko esan zidaten”

“Iristean dugun kezka nagusietako bat da bestelako kultura eta hizkuntza ekartzen dugula, baita psikologikoki daukagun zama ere (torturak eta denetik jasandako lurraldeetatik gatozelako)”, baina Euskal Herrian zorte handia izan duela dio. 2015ean asiloa ukatzen ziotela jakin zuenean, “bat-batean 15 egunetan Espainiako Estatua uzteko esan zidaten, nahiz eta bizitza guztirako kartzela-zigorra nuen itxaroten jaioterrian. Ordutik jaso dudan babesa oso handia izan da; gizon batek esan zidan baserri bat zuela eta giltza emango zidala, han ezkutatzeko; gose greba ere egin zuten batzuek…”. Azkenean, jarritako helegitea irabazi eta asiloa baimendu zioten Aaliari 2016ko urrian.

“Interes politikoak bizitzaren gainetik daudela ikusi dut. Espainiak Marokon interes asko dauzka eta niri asiloa emateak esan nahi du onartzea giza-eskubideen urraketa larriak ematen direla Saharako lurralde okupatuetan”.