Zergatik ez dute irakasleek zuzendari izan nahi?
EAEko ikastetxe publikoen %40tan (200 eskolatik gora) ez da irakaslerik aurkeztu zuzendari izateko eta Hezkuntza Ikuskaritzak aukeratu behar izan du zuzendaritza taldea (zuzendaria, ikasketaburua eta idazkaria), batzuetan gogoz kontra. Albisteak galdera ugari sortu dizkigu.
Ongi definituta eta zehaztuta al daude zuzendaritzaren funtzioak? Eta horren arabera zein profil da egokiena, irakasle-pedagogoa ala antolakuntza-koordinazioan aditua? Zergatik ez du zuzendariak prestakuntza gehiago, zergatik ez dago unibertsitatean zuzendari izateko formazio osagarririk? Formazio hori aukeratu dutenei zuzendari posturako deialdia egitea ez al litzateke eraginkorragoa izango? Ikastetxeko irakasle eta langileen inplikazioa eta babesa du inguruan zuzendaritzak, hezkuntza proiektua denon artean aurrera atera ahal izateko, ala bakarrik ikusi ohi du bere burua? Gainerako irakasleekiko harremanean eta maila pertsonalean zein ondorio dakartza zuzendaria klaustrokide izateak eta hainbatetan agintea hartu behar izateak? Bere funtzioak betetzeko aski eskumen, autonomia eta konfiantza ditu, ala malgutasunerako tarterik gabe administrazioaren erabakien menpe lotuta ditu eskuak? Zuzendaritza-lanak burutzeko behar adina baliabide eta denbora dute ala irakaskuntza-orduei gehitu beharreko lanak dira, eginkizun eta denbora karga handiegia pilatuz? Pizgarri ekonomikoak, hartutako ardura eta dedikazioaren tamainakoak al dira? Behar bezala baloratzen al du lan hau eskola-komunitateak eta administrazioak? Aurreko zuzendaritza taldearekin elkarlanean trantsizio faserik egiten al da, bat-bateko jauzia izan ez dadin?
Galdera gehiegi eta erantzunik?