Urretxindorra, bazterketa arriskuan dagoen nerabea eta unibertsitarioa elkartzen dituen proiektua

Atalak: Gizartea, Hezkuntza, Migrazioa

Euskal Herrian denbora gutxi daramatelako, arazo emozionalak edo harremanak garatzeko zailtasunak dituztelako laguntza behar duten atzerritar jatorriko gazteek (10-14 urtekoek) unibertsitateko ikasleekin denbora librea partekatzea da Urretxindorra egitasmoaren helburua. Aurten 28 bikote elkartu dituzte Donostia, Errenteria eta Hernanin, eta oso positiboa izan da harreman berezi horren emaitza, bi norabideetan.

Astero eta borondatez elkartu dira nerabea eta unibertsitarioa, helburu garbiarekin: mentore lan eta eredu positibo horri esker, nerabearen “autoestimua, garapen pertsonala, emozionala eta soziala hobetzea. Eta lortu dugu, hobekuntza ikusi dugu gazte hauengan; ez die bat-batean bizitza aldatu, baina sortzen diren lotura indartsuek eta konfiantza harreman horrek arrasto positiboa utzi du beraiengan”, esan digu Loira Manzanik, egitasmoko koordinatzaileetako batek.

Hizkuntza ere bada proiektuaren ardatz nagusietako bat: atzerritik iritsi den nerabeak euskararekiko izan dezakeen langa emozionala apurtzea da xedea, ikusi eta sentitu dezala euskarak ez duela baztertzen, barne hartzen baizik.

Mentoreentzat ere, proiektua ikas prozesu paregabea dela nabarmendu dute antolatzaileek. “Egoera eta errealitate oso ezberdinak bizi dituzten pertsonenganako jakintza, ulermena eta enpatia” garatzen ditu.

Joan den astean egin dute Urretxindorra egitasmoaren ikasturte amaierako jaia. Proiektuak hirugarren urtea egin berri du eta bikote kopuruak eta herri parte-hartzaileak gora egin dute aurten, eskaera gero eta handiagoa delako. Dena den, kopurua ahal bezainbeste handitzea ez da asmoa, “bikote bakoitza ondo zaindu nahi dugulako”. Sos Arrazakeria, Donostiako Udala, Kutxa Fundazioa eta Nghtingale sarea daude ekimenaren atzean.