Gorputz ez estandarrak normalizatzea lortzen ari den yoga irakaslea

Atalak: Diskriminazioa, Gorputza

“Emakumea, beltza eta obesoa”. Horrela definitzen du bere burua Jessamyn Stanley estatubatuarrak. Yogari buruzko bere irakaspenek jarraitzaile andana eta helburu garbia dute: egungo estetika irizpideetatik at dauden gorputzak ikusaraztea eta gorputz horiek guztiek lotsarik sentitu gabe yoga egin dezaketela adieraztea.

“Gure gizartean deskonexio handia dago jendeak egin dezakeenaren eta egin dezakeela esaten diogunaren artean. Niri yogak erakutsi dit berau praktikatzeko indartsua eta kapaza naizela. Dena den, konpondu beharreko benetako arazoa barru-barruan daramagu”, dio. Yoga egiten hasi eta internetera irudiak igo zituen, beste zale batzuekin teknikak partekatzeko asmoz, baina bestelako mezuak iristen hasi zitzaizkion: Stanleyk jendea harritu eta inspiratzea lortu zuen, pertsona lodi bat halakoak egiten ikusita. Eta gorputz aktibismoari ekitea erabaki zuen.

“Lodiak, zaharrak, txikiak… Bestelako gorputzak normalizatzea da lehentasuna eta yoga mota hau erakustea tresna ona izan daiteke ni bezalako jendeak bere burua onartzeko eta autoestimua berreskuratzeko. Kontua ez da ‘nola ikusten naiz’ galdetzea, ‘nola sentitzen naiz’ baizik”.

Yoga ez da beti praktika erraza, maiz konplexuak egiten zaizkio ariketak, baina maite du eta erreferente bihurtu da jada: milaka eta milaka jarraitzaile ditu sare sozialetan eta Youtubeko kanalean, eta arrakasta handia du bere liburuak: Gorputz guztientzako yoga. Ahaztu beldurrak, esterara igo eta maitatu zure gorputza.