Haurrei debekatutako hotel eta jatetxeen ostean, orain zineak. Umefobia?

Atalak: Diskriminazioa, Haurrak, Zinema

3 urtetik beherako umeei zinean sartzea debekatzeko neurriak hartu ditu Udalak Mazatlán hirian (500.000 biztanletik gorako hiri mexikarra). Haurrik gabeko gune gero eta gehiago eskaintzen diren garaiotan, polemika piztu du albisteak: lasaitasuna nahi duten helduak erakartzeko zilegi diren erabakiak ala umefobia?

Gurasoek sen onez erabaki beharko lukete, haur bakoitzaren garapenaren eta arreta eta heldutasun mailaren arabera, noiz dagoen prest seme-alaba zinera joateko, eta ea gogorik duen horretarako, baina ez da bidezkoa haurrei zuzendutako pelikuletara 0-3 urteko ume guztiei sarrera debekatzea. Hala argudiatu dute erabakia diskriminatzailea dela uste dutenek (ni neu, Pottokiak ikusten izan naiz 3 urteko haurrarekin, inongo arazorik gabe).

Eztabaidaren muinean, elkarbizitza

Duela hilabete bat, umerik onartzen ez duten hotelek adin mugarik ez jartzeko neurria hartu nahi izan zuen Valentziako Gobernuak, baina ezin izan zuen aurrera atera. Orduan ere, eztabaida sortu zuen gaiak. Ume-zurrunbilotik urrun, helduak lasai egoteko aukera eskaintzea aproposa iruditzen zaie batzuei. Arrazakeriaren, matxismoaren eta homofobiaren pare, haurrak adinagatik diskriminatzea umefobia dela diote bestetzuek, ematen diren egoera ugari ez direla haurraren ardura, dena onartzen dioten guraso axolagabeena baizik, eta arrazoia lasaitasuna bada orduan jatetxe eta hoteletara sarrera debekatu beharko litzaiekeela baita ere giri mozkorrei edota oihuka hitz egiten duten helduei, adibide pare bat jartzearren.