Bestelako jolas-parkeen Euskal Herriko gida aurkeztu dute

Atalak: Haurrak, Jolasa

Jolaserako espazioen Euskal Herriko gida da jolasparkeak.eus. “Patroi berdina erabiliz eraiki diren jolas-parkeak” saihestu eta bestelako ereduak bildu asmoz, jolasguneen mapa osatzen joatea da helburua.

Harri Jasotzaileen Parkea, Uharte-Arakilen.

Hala, jolaserako espresuki sortutako parkeez gain, jolaserako egokiak diren aire libreko espazioak ere kontuan hartzen ditu ekimenak, plaza bat, erreka bazterra, lorategia edo baso ingurunea jolaserako aproposak izan daitezkeelako. Gida osatzeko lehenetsi dituzten irizpideen artean daude, esaterako, material naturalez egindako jolas-parkeak, moldaerrazak, haurraren motrizitatea, sormena eta abenturarako sena sustatzen dutenak edota prozesu parte-hartzaileen bidez auzolanean osatutakoak.

Denon artean elikatuko den mapa

Txatxilipurdik, Olgetak eta Goienak elkarlanean abiaturiko gidak 13 gune baino ez ditu oraindik, mapan kokatuta eta informazio-fitxa lagun, baina asmoa da hilero parke berri bat gehitzea eta nahi duen orok parte hartzea: proposamenak egiteko eta gida aberasten joateko aukera ematen du webguneak berak.

Piraten Galeoia, Gasteizen.

Zuhaitz Parkea, Eskoriatza eta Aretxabaleta artean.

Piraten kioskoa, Mañarian.