Nolakoak izan behar dute ba emakume super-heroiek?

Atalak: Generoa, Zinema

Wonder Woman super-heroiaren film arrakastatsua eredutzat hartu da munduko neska –eta mutil– askorentzat: emakumezko protagonista, boteretsua, heroia duelako. James Cameron zuzendari ezagunak, ordea, adierazi du ez dela emakume indartsu bat irudikatzeko modu egokia, eta berehala erantzun dio pelikulako zuzendari Patty Jenkins-ek.

Cameronen hitzetan, filmeko Wonder Woman “ikono objektibizatua da; Hollywood maskulinoa betiko gauza berberak egiten! Niretzat, atzerapausoa da. Sarah Connor [Cameronek berak zuzenduriko Terminator pelikulako protagonista] ez zen edertasunaren ikono bat. Indartsua zen, arazo asko zituen, ama izugarria zen, eta publikoaren errespetua irabazi zuen, bere adoreagatik”.

Patty Jenkinsek tinko erantzun dio: “Munduko emakumeentzat Wonder Woman zer den edo zer irudikatzen duen ulertzeko James Cameronen gaitasun falta ez da harritzekoa, ez baita emakumea. Emakume indartsuak apartekoak dira (…) Baina indartsu izateko emakumeek beti zailak, gogorrak eta arazo askorekin izan behar badute, ez bagara aske multidimentsionalak izateko edo ez badugu emakume ikonotzat hartzen ederra eta maitagarria delako, orduan ez gara oso urruti iritsi, ezta? Uste dut emakumeak izan daitezkeela eta izan behar dutela DENA, hain juxtu gizonezko protagonistak bezalatsu. Ez dago emakume boteretsua izateko modu egokia eta desegokia. Eta pelikula ikusi duen publiko femeninoak berak aukeratu eta epaitu ditzala aurrera egiteko bere ikono propioak”.

Gaiaz gehiago:

Wonder Woman emakume super-heroiaren filmak haurtzaindegi batean eragin duena