Jolastokia eraldatu… jolasgaraia luzatu gabe?

Atalak: Hezkuntza, Jolasa

Natura gehiago sartu edota futbolaren protagonismoa murriztu nahian jolastokia birpentsatzen ari diren ikastetxeak gero eta ugariagoak dira. Espazioa eraldatu bai, baina ikasgai inportanteen artean atseden hartzeko ordu erdiko etenaldia izaten jarraitzen du jolasgaraiak.

Egunean ordu erdi ingurukoa da Lehen eta Bigarren Hezkuntzan jolastokian nahieran aritzeko ikasleari utzi ohi zaion tartea. Baina haur eta gazteen garapenerako hain garrantzitsua bada aire librea, buruaz gain gorputza eta zentzumenak lantzea, natura eta ingurua esploratzea, espazio horietan sexu eta adin ezberdineko ikasleen artean sortzen diren hartu-eman eta harremanak bultzatzea, jolas librea eta aukera anitzak esperimentatzea, lau paretetatik kanpo jakin-mina asetzen eta ikasten jarraitzen dugula sinestea… nahikoa al da ordu erdi egunean? Eta batez ere, nahikoa al da jolastokia birpentsatzea, jolasorduaren kontzeptua bera birplanteatu gabe? Etenaldi eta arnas hartzeko tarte izatetik harago, ez al luke ikasten eta garatzen segitzeko abagune izan behar? Ez al litzateke beste modu batera antolatu behar eguneroko ikas-jardunean, integratuago, malguago, askeago? Horretarako, jakina, curriculuma ere gakoa da, irakasleek eman beharreko gaitegi saturatuek aukera gutxi uzten baitute bestelakoetarako.

Gaiari lotuta:

– Natura nola bizi eremu urbanoko ikastetxeetan

– Ikastolako jolastokia amesten