“Three billboards outside Ebbing, Missouri”. Dibertigarria bezain latza

Atalak: Zinemaldia 2017

Maite dugu Frances McDormand aktorea, eta maite dugu Three billboards… filmean hark antzezturiko pertsonaia protagonista: polizia harroputzei, apaiz hipokritei eta senar-ohi maltratatzaileei aurre egiten dien emakume indartsu eta borrokalaria. Borroka da, azken finean, bere barruko min eta sufrimenduei zentzua ematen diena.

Martin McDonagh zuzendariak berak sinaturiko gidoi bikainari esker, barretik negarrera natural egiten du salto tragikomedia honek: sarkasmoz eta zinismoz beteriko elkarrizketen bidez, poliziaren torturez, arrazismoaz, homofobiaz, minbiziaz edota Elizaren pederastiaz mintzo zaizkigu, ahobilorik gabe. Eta oinarrian, mezu garbia: gorrotoak gorroto gehiago dakar. Kontua da pertsonaiak gai ote diren edota prest ote dauden gorrotoari uko egiteko.

Alabaren hilketa oraindik argitu ez dutelako haserre dago Mildred, eta herriko poliziak ditu jomugan. Argumentu hori aitzakia hartuta, AEB ankerrenaren erretratu dibertigarri bezain latza egiten du zuzendariak, eta aktoreen lan txalogarria lagun du helburu horretan.

PERLAK

Three billboards outside Ebbing, Missouri

Zuzendari eta gidoilaria: Martin McDonagh

Aktoreak: Frances McDormand, Woody Harrelson, Sam Rockwell, Peter Kinklage.

Britainia Handia, 115 minutu.