“120 battements par minute”. Aktibistaren gidaliburua

Atalak: Zinemaldia 2017

Sutsua, gerrillaria, pasionala da 120 battements par minute, Act Up taldearen aktibismoa bezalatsu. 90eko hamarkada hasiera da eta hiesak jende andana hiltzen du Frantzian (ere), baina Parisko aktibistak ez daude amore emateko prest, instituzioak eta laborategi farmazeutikoak presionatzea dute borroka, askok badakiten arren ez direla borroka horren amaierara iritsiko.

Inpaktua sortuko duen ekintza ala edukiz betea? Herritarrak kausara erakarriko dituzten mezu alaiak ala kritika deserosoa oinarri duten mezu politikoak? Hiesaren ikerketan diharduten laborategiekin mahai berean eseri ala haien sekretismoa salatzeko erasoa hobetsi? Nola iritsi jendearengana? Hedabideetara? Instituzioetara?… Act Up taldean infiltratzen da kamera, dituzten asanbladak, eztabaidak eta botere-borrokak filmatzeko. Edozein herri mugimenduk islatuta ikusiko du bere burua pelikulan, eta lezio interesgarri ugari ere aterako ditu, parte-hartzeaz, lidergoez, iritzi talkez eta borroka bat kudeatzeko moduez. Robin Campillo zuzendariak, baina, ez digu soilik aktibismoaz hitz egin nahi, “marikoien, toxikomanoen, puten eta presoen” gaitz tabu eta ikusezina ere protagonista da istorioan, eta maisuki orekaturiko dinamika hori da istorioaren funtsa: ikusezin izateari utzi nahi duen kolektiboaren borroka bizi eta beroa batetik, hiesak kutsatutako gaixoaren gainbehera geldo eta saihestezina bestetik.

Indartsu hasten da pelikula, eta tentsio narratiboari fin eusten dio istorioak, tartean gidoiari esker. Cannesen sari nagusia lortu zuen filmak.

PERLAK

120 battements par minute

Zuzendari eta gidoilaria: Robin Campillo

Aktoreak: Nahuel Pérez Biscayart, Arnaud Valois, Adèle Haenel, Yves Heck..

Frantzia, 143 minutu.