Ikasleek anfibio eta narrastiez putzuan ikasitakoa liburu bihurtu dute

Atalak: Hezkuntza, Ingurumena, Natura

Garai batean putzu izandakoa baina denborarekin galdutakoa berreskuratu zuten Hernaniko Ereñotzu auzoan Txirrita eskola txikiko hezitzaile, ikasle eta gurasoek, eta putzua baliabide ezin hobea bihurtu zen matematikak, aldaketa klimatikoa, toponimia, animalien metamorfosia… eta oro har curriculumeko gaiak lantzeko. Ziraba proiektuan ikasitakoa liburura ekarri dute orain.

Proiektu haren bidez, Zepadi putzua birsortzea lortu zuten, Aranzadi Zientzia Elkartearekin elkarlanean, eta urtebetean landare urtarrak eta narrasti eta anfibio ugari agertu ziren. Esperientzia hartaz eta esperientziaren bidez narrasti eta anfibioei buruz lortutako informazio asko ematen du liburuak. Ez hori bakarrik, anfibioak eta narrastiak ikustera irten nahi dutenentzat gomendioak eta eman beharreko urratsak ere jasotzen dituzte, besteak beste. Zer esan ume bati, harri bat altxatu eta arrautza multzo bat topatuz gero? Eta udan bi sugandila bat bestearen atzetik korrika ikustean? Udaberrian lepo ingurua urdindua duen musker berdea aurkituz gero? Errepidean harrapatua izan den sugea atzemandakoan?… “Ez da gida arrunta, zientziaren zorroztasuna mantentzen duen dibulgaziozko liburua da”, esan digu Iñaki Sanz-Azkue ekimenaren bultzatzaileetakoak: naturarekiko interesa duen edozein hezitzaile, guraso edo herritarri dago zuzendua eta lokala izan arren, Euskal Herriko txoko askotan aurki daitezkeen espezieak jorratzen ditu.

Azken finean, uste baino gertuago dugu bioaniztasuna bertatik bertara lantzeko aukera, baita hiriguneetan ere (Natura nola bizi eremu urbanoko ikastetxeetan artikuluan ikus daitekeenez) eta ez dezagun ahaztu, Euskal Herrian hiriburuetako ikasleek sabanako eta oihan tropikaleko animalia gehiago ezagutzen dituzte, bertako animaliak baino (irakurri Ezagutzen al dituzte umeek bertako animalia arruntenak? artikulua).

Ziraba proiektuko irudia.