Lantokiko sexu gehiegikeriei aurre egiteko, protokoloa

Atalak: Indarkeria matxista

Harvey Weinstein produktoreak emakume aktoreen aurka urte luzez eta industriaren konplizitateaz egindako sexu jazarpen eta gehiegikeriak azaleratu ostean, bere produktoratik eta Hollywoodeko Akademiatik kanporatu dute. Gurean ere badira botere-harremana baliaturik lan munduan sexu-erasoak egiten dituztenak, ez ordea halakoak atzeman eta neurriak hartzeko protokoloa duten enpresa askorik.

Euskal Herrian Sortuk (ondoren hainbat herri mugimenduk) kanporatutako militantearen kasua ezagun egin bada ere, ez da bakarra. Pertsona hori bota baina bere identitatea ezkutuan mantentzea erabaki zuen Sortuk, beste alde batera begiratzea edo afera isilpean “konpontzea” nahiago duenik ere bada. Protokolo argiak behar ditugu: zein prebentzio neurri hartuko dira? Nola salatu dezakete biktimek, anonimoki ez bada, ondorio txarrik ez izateko adinako bermeekin? Zeintzuk izango dira protokoloaren arduradun, independente jokatzeko eta ez agintarien konplize? Nolakoa izango da salatua izan den erasotzaileari egingo zaion galdeketa? Nola landuko da kasua lankideekin eta nola talde osoaren babesa biktimarekiko? Zein zigor aurreikusiko zaizkio erasotzaileari lantokian? Eta sozialki? Judizialki? Publikoki salatuko al da erasotzailea? Eta hala egiten ez bada, kanporatzen den pertsonaren identitatea ez azaleratzea ez al da arazoa gainetik kendu eta beste norabait bidaltzea?…

Ziurrenik, arlo honetan ere ugari daukagu ikasteko herri mugimenduetatik eta zehazki mugimendu feministetatik. Adibiderako, Lizarrako jaietan sexu-erasotzailea txosnagunetik bota zutenekoa.