Erasoak eraso, lesbiana bat protagonista duen komikia argitaratuko dute

Atalak: Diskriminazioa, Homosexualitatea

Komikiko pertsonaia da Ana, lesbiana eta umoretsua. Gehitu elkartearen aldizkarian ateratzen da 2013tik eta orain liburu bihurtu nahi dituzte haren bizipenak, bereziki gazteek eta nerabe lesbianek erreferente positiboak izan ditzaten. Asmo horri mezu homofobo, lesbofobo eta matxistekin erantzun dio hainbatek, baina garbi utzi du Gehituk: komikia kaleratuko dute, mezuek eurek erakusten baitute “gure gizarteak oraindik egin behar duen bide luzea sexuafektibitate eta genero aniztasuna normaltzeko”.

Liburua argitaratu ahal izateko diru-bilketa kanpaina martxan jarri zutenetik jaso ditu erasoak Teresa Castro egileak, sare sozialetan. Kontrara, albiste ona da gutxieneko aurrekontua lortu dutela dagoeneko eta beraz komikiak argia ikusiko duela, euskaraz eta gaztelaniaz. Kanpainak aurrera jarraitzen du eta gutxienez 2.500 ale kaleratzea da helburua, gero Euskal Herriko ikastetxeetan eta kirol eta aisialdi taldeetan Gehituk ematen dituen tailerretan erabiltzeko, besteak beste. Edizio digitala ere badute buruan.

Eguneroko buruhausteei umore onez aurre egiten die Anak, L.S.B., Ana Lesbikomikia! argitalpeneko protagonistak. LGTBI kolektiboarentzat garrantzitsuak diren gaiei ere ikusgarritasuna ematen die komikiak, hala nola armairutik ateratzearen prozesua, sexuaren bidez transmititzen diren infekzioak, transexualitatea, GIBa edota gizartearen gaitzespena.

Proiektua lagundu nahi duenak helbide honetan egin dezake.