28ko manifestazioen atarian, adostasuna urruti

Atalak: Hezkuntza

EAEko hezkuntza publikoko murrizketei aurre egiteko negoziaketen baitan, Jaurlaritzaren proposamena ez dute onartu sindikatuek: diote euren aldarrikapenen %5era ere ez dela iristen proposamena, baina jarrera aldaketa ikusi dutela administrazioan, borondate politiko kontua dela eta hezkuntzan egiten den inbertsioa handitzea dela gakoa. Hiriburuetan manifestazioak deitu dituzte larunbaterako.

Zein puntutan daude negoziaketak?

Oposaketak, eta oposaketen ondorioz hainbat irakasle egonkortzea (behin-behinekotasuna txikituz) proposatu du Cristina Uriarte Hezkuntza sailburuak. Gai horiek, ordea, ez dira negoziaketa mahaiko gaiak, sindikatuen ustez, “batetik derrigor egin beharreko prozedura direlako oposaketak, eta bestetik aurreikusita zeuzkatelako jada”. Hortaz, murrizketen gaiari zuzenean heltzen dien proposamena “oso-oso-oso eskasa” dela eta sindikatuen aldarrikapenen %5era ere ez dela iristen dio Steilaseko Aitor Idigorasek: Lehen Hezkuntzan irakasleen ordezkapenak lehenengo egunetik egitea eskaini du Jaurlaritzak, baina hori etapa guztietan egitea nahi dute sindikatuek.

Madril: muga ala aitzakia?

Mugak Madrilek jartzen dituela nabarmendu du behin baino gehiagotan Cristina Uriartek, baina baliabideak eskola publikora bideratzeko erabakimena eta eskumena Jaurlaritzak dituela dio Aitor Idigorasek, borondate kontua dela; “eta horren isla, Nafarroako Gobernuak ez dituela irakasleen bajak zigortzen, EAEn egiten duten moduan; edota Haurreskolen eskumena adibidez %100ean Jaurlaritzarena dela eta negoziaketak atzeratuen ditugun eremua dela, beraz Madrilen aitzakiak ez du balio”. Irakasleen ordezkapenak lehenengo egunetik egiteaz gain, irakasle plantilla handitzea, behin-behinekotasuna %40tik %6ra murriztea, ikasgela bakoitzeko ikasle kopurua %10 txikitzea eta erretiro duinak bermatzea ere eskatzen dute sindikatuek, besteak beste.

Sindikatuen eskaerak diru-partida zehatzekin konpontzen direla eta gako nagusia inbertsioa dela argi dute LAB, ELA eta Steilasek: hezkuntzara bideratzen dena gutxienez Europar Batasuneko batez bestekora handitzea dute aldarri, eta Jaurlaritzaren azken proposamenak “oso modu hutsalean handitzen du inbertsio hori”. “Cristina Uriartek, sindikatuekin baino, Pedro Azpiazu Ekonomia sailburuarekin du konfrontazioa, zehazteko aurrekontuetan zenbat bideratuko zaion eskola publikoari”, dio Idigorasek.

Bilera berrien zain, mobilizazioak

Bizpahiru astetan espero da negoziaketak jarraitzeko bilerak deitzea Jaurlaritzak. “Jarrera aldaketa bat dago, konfliktoa onartu dute eta akordioa beharrezkoa dela diote. Eskola publikoaren aldeko apustua garbia bada, gure aldarrikapen guztiak egingarriak dira”, ziurtatu du Idigorasek. Bilera berrien zain, mobilizazioen agenda berdin mantenduko dute eta larunbat honetan bertan manifestazioak egingo dituzte: 17:00etan abiatuta Donostia eta Gasteizen, eta 17:30ean Bilbon. Gauzak aldatu ezean, ondoren etorriko dira borroka asteak, sektorekako grebak eta greba orokorra hezkuntza publikoan. “Presio neurria izatea espero dugu, administrazioak onartu duelako bake soziala bilatu nahi duela hezkuntzan”.