Haizea alde behar du Hezkuntza sailburuak

Atalak: Hezkuntza

EAEko hezkuntza publikoaren baldintzak hobetzeko eskatuz kalera atera da jendea asteburu honetan, Bilbo, Donostia eta Gasteizen. Erantzun zabala izan dute manifestazio deialdiek, baliabiderik gabe kalitatezko hezkuntzarik ez dagoela salatzeko. Hala, konfrontazio dinamikari eusten diote sindikatuek, haien aldarrikapenak eta Cristina Uriarte Hezkuntza sailburuaren proposamena elkarrengandik urruti baitaude oraindik. Negoziatzeko borondatea behintzat egon badago eta laster iritsiko diren bilera berrietarako, presio neurria izan nahi dute mobilizazioek (borroka asteak, sektorekako grebak eta greba orokorra daude aurreikusita).

Irakasle kopuruaren, ordezkapenen, behin-behinekotasun tasaren, ikasle ratioaren edota erretiroen gainean egin beharreko negoziaketek gako inportantea dute atzean: Jaurlaritzak hezkuntzan egiten duen inbertsioa handitzea. Horregatik, Cristina Uriartek kanpoan bakarrik ez, etxe barruan ere izango du beharbada negoziatzeko beharrik, aurrekontuetatik hezkuntzara zenbat bideratu adostu aldera –2018ko aurrekontu planean, ez da aurreikusten sindikatuek egin dituzten eskaerei heltzeko diru-partidarik–. Azken finean, hezkuntzan bake soziala nahi du Uriartek eta hala zaio komeni, ez alferrik egitasmo anbiziotsua du eskuartean. Duela urte batzuetatik lantzen ari den Heziberri planaren azken fasean murgilduta, eskola publikoa eta itunpekoa batuko dituen lege berrirako urratsak ematen ari da sailburua eta lege berria lorpen handia litzateke, urtetako ahaleginaren emaitza arrakastatsua… baldin eta hezkuntza komunitatearen gehiengoaren babesa balu. Bai, giroa bare eta haizea alde behar ditu sailburuak, bestela ere zaila eta arantzatsua izaten ari den lege egitasmoa hezkuntza eragileekin negoziatzeko.

Ikusiko dugu nola eragiten duen lege proiektu horrek eta nola presio herritarrak Cristina Uriartek sindikatuei helaraziko dien hurrengo proposamenean, baina bai ELA, LAB eta STEILASek, bai mobilizazio deiek orain arte jaso duten erantzunak garbi utzi dute borrokan segitzeko indartsu daudela.