“Ikasleek magiaren bidez ikasten dutena, ez dute ahaztuko”

Atalak: Hezkuntza

“20 urte daramatzat ikasgelan magia erabiltzen eta gatazkak konpontzeko, kontzeptuak irakasteko, komunikazioa lantzeko, edukiak modu atseginagoan errepasatzeko, pentsamendu matematikoa garatzeko, motibatzeko, autoestimua hobetzeko, sormena garatzeko, gelako tentsioa baretzeko… tresna izugarria da”.

Xuxo Ruiz irakasle andaluziarra da mintzo dena, Magia Hezitzailea formakuntza saioak ematen ditu irakasle eta gurasoentzat, eta argi du: “Ikasleek magiaren bidez ikasten dutena, ez dute ahaztuko”. Adin, etapa eta ikastetxe ugaritako ikasleekin magia modu hezitzailean erabiliz urteotan ikasitakoa bildu eta liburua argitaratu du, Educando con Magia.

Bere hitzetan, magia egunero erabiltzen du ikasgelan, “Hizkuntzan, Matematikan, Zientzietan… baita jolastorduan ere! Edozein edukirekin aplikatu daiteke magia eta nik erabiltzen ditudan jolasak egiteko ez da abilezia berezirik behar, edozeinek egin ditzake, oso dibertigarria da eta baloreak eta curriculumeko edukiak lantzeko baliagarria da; zerbait oso zehatza azaltzeko baliatzen dut, komunikazio gaitasuna praktikatzeko edo giza-gorputzak nola funtzionatzen duen ikasteko”.