Haurrak filosofo, galdera inportanteak eta gogoeta interesgarriak dituztelako

Atalak: Haurrak, Hezkuntza

6-16 urteko haur eta gazteekin filosofia lantzen hasi dira Oiartzunen, eztabaidatzeko, begirada kritikoa eta gogoeta xaxatzeko, galderak eta zalantzak trukatzeko… eta zera deskubritu dute: galdera asko eta galdera inportanteak dituztela haurrek, eta hausnarketa oso interesgarriak egiten dituztela, sarri helduei otuko ez zitzaizkigun ikuspuntuak, beharbada ez daudelako hain kutsatuta eta mundua aztertzeko begirada freskoa dutelako oraindik.

“Filosofia filosofoen testu zailekin, gai ilunekin lotu izan da, eta defendatu nahi dugu haurrek, filosofo handi horiek ezagutu gabe ere, ikaragarrizko gaitasuna daukatela filosofia egiteko, modu sinple baina aldi berean oso sakonean”, kontatu dute Azmarrin elkarteko kideek Euskadi Irratian. Azmarrinek jarri du martxan Oi(h)artzun filosofikoa ekimena, herriko Abaraxka ludotekarekin elkarlanean. Erantzun zehatzetatik harago, galderak, interesak eta kezkak trukatzea da asmoa, elkarren iritzietatik aberastea.

Azken finean, ez al dira gogoeta, begirada kritikoa edo eztabaida, ikas-prozesuan garatu nahi diren balio funtsezkoak? Ez al luke filosofiak leku handiagoa behar hezkuntzan? Hori pentsatu dute nonbait ekimenaren bultzatzaileek, eta hainbat saio antolatu dituzte Oiartzungo ludotekan, gaitegi zabala hizpide: sentimenduak, artea, edertasuna, bizitza, identitatea, laguntasuna, hizkuntza, unibertsoaren mugak…

Guztia kuestionatzeko eta bide berriak irekitzeko aukera aproposa dute umeek, eta haien ekarpenetan arreta jarri eta gure begirada zabaltzeko abagune ezin hobea dugu helduok.