Markeli taka-taka egin diote ikasle helduagoek

Atalak: Aniztasun funtzionala, Hezkuntza

Garapen motorra galarazten dion paralisia du 7 urteko Markelek, ez dauka nahikoa indarrik gerria eta hankak behar bezala mugitzeko eta taka-taka behar du, baina oso garestia da. Eskolan bertan aurkitu dute soluzioa: ikasle helduagoek, Soldadura eta Galdaragintza Ziklokoek, egin diote ibilkaria.

Taka-taka batek 1.000-2.000 euro inguru balio ditu eta taka-taka bereziek 6.000 eurotik gora; garestia da, baita Markelen gurasoentzat ere. Horregatik, Andoaingo La Salle Berrozpen erabaki dute ikasturtean zehar Soldadura eta Galdaragintza Ziklo ertainean jartzen dituzten erronketako bat izatea ibilkaria egitea, eta bi astez horretan aritu dira; denera 24 ikasle, zortzi taldetan banatuta. DBH gainditu osteko zikloa da eta beraz 16 urte baino gehiago dituzte ikasleek.

Zer hoberik, aniztasuna lantzeko?

Konplikatua izan da taka-taka egitea (fisioterapeutaren laguntza izan dute, neurri eta behar zehatzetara egokitu dute, arnes modukoa ere badu ibilkariak, hankak eta eskuak libre uzteko…), baina gogotsu eta bereziki motibatuta aritu dira ikasleak, Mikel Adrian irakasleak kontatu digunez (beste hainbat irakaslerekin batera hartu du parte proiektuan). Azken finean, balio praktikoa, erreala eta gainera inportantea izan du beraien lanak, eta bertatik bertara bizitu dute prozesua; zer hoberik, aniztasuna lantzeko? “Eskolan balore batzuk lantzen ditugu, eta egiten dugun horretan islatzen da”, kontatu digu Adrianek.

Ikasle eta irakasle taldeek egin dituzten taka-taka guztietatik, egokien ikusi dutena jaso du Markelek, eta besteak desegin egin dituzte, materiala beste proiektu batzuetan berrerabiltzeko. Markeli izugarrizko mesedea egin dio ibilkariak, psikomotrizitatea lantzeko ezinbesteko tresna baitu, eta “liberazio modukoa” izan dela adierazi du fisioterapeutak.