Emakume guztiek zaintza-greba eginez gero, zenbat pertsona zaindu beharko lituzke gizon bakoitzak?

Atalak: Feminismoa, Haurrak, Zahartzaroa

Hainbat gizon M8an zaintza kolektiboak antolatzen ari diren honetan, ariketa proposatu dit Estitxu lankideak: 16-69 urte arteko gizon bakoitzak 14 urtetik beherako eta 70etik gorako zenbat pertsona hartu beharko lituzke bere gain, denen zaintza bermatzeko? Hego Euskal Herriko datu demografikoetara jo dut.

Eta datuek harritu egin naute: Hego Euskal Herrian dauden 14 urtetik beherako haur eta gazteak (386.981) eta 70etik gorako adinekoak (460.892) batuta (guztira 847.872 lagun, soilik adinaren irizpidea kontuan hartuz agian zaintza behar dutenak), horiek guztiak gutxiago dira 16 eta 69 urte artean dituzten gizon kopurua baino (973.879). Alegia, gizon bakoitzak haur edo zahar bakar bat zainduta, soberan leudeke bermatuta zaintza zamak.

Kontuan izanik beste aldagai batzuk daudela jokoan (lanera joan, otorduak prestatu…), txandaka gizon batek pertsona bat baino gehiago bere ardurapean hartzea, hau da zaintza kolektiboak antolatzea, aukera bideragarria da, datuak eskuan: 6 orduko txandarekin, gizon bakoitzak gehienez lau pertsona lituzke bere arretapean, adibidez.

Martxoaren 8tik haratago, burura hiru gogoeta datozkit: bat, zaintza partekatuaren ikuspegitik datu positiboak dira, ardura gizon eta emakumeen artean benetan partekatzeak errazagoa baitirudi zama zenbaterainokoa litzatekeen ikusita. Bi, zerbait oso gaizki ari gara egiten gizartean, datuak horiek izanik zaintza emakumeen aldera hainbeste desorekatzeko, are gehiago kontuan harturik sarri emakume bakoitzak pertsona bat baino gehiago duela bere zaintzapean. Eta hiru, esango nuke errealitatea eta dugun pertzepzioa ez datozela bat, bestela mugimendu feministatik zaintza-greba planteatu dutenean zergatik izan da inguruan gehientsuen entzun dudan esaldia “hori ez da erreala”, ez dela egingarria eta gizonek gain hartuko luketela adieraziz?

Eta panorama zabalduz, zaintza (partekatu) kolektiboa aukera aproposa da, lehen aipaturiko beste aldagaiak ere (lana, etxea, aisia…) uztartu ahal izateko.