Arbitrorik gabeko saskibaloi liga horizontala eta autogestionatua

Atalak: Jolasa, Kirola

Horizontala, autogestionatua (arbitrorik gabea), doakoa eta mistoa, horrelakoa da Alacanteko Saskibaloi Liga Kooperatiba. Kirol-kluben filosofiatik at eta ohiko ligek suposatzen duten dirutzatik ihesean, 2017 bukaeran jaio zen eta dagoeneko 80 jokalari dira, zortzi taldetan banatuta. Auzoak bizi mantentzen dituztela eta kirola beste modu batera ulertzen dutela diote.

Falta zalantzagarriak daudenean, zer?

Dirurik ez da behar parte hartzeko, baina bai inplikazioa. Azken finean, ez dago sustatzailerik, denen artean antolatzen dituzte partiduak, auzotako kantxak aprobetxatuz. Talde batzuk eta besteak, gizon-emakumez osatuak, euren artean jartzen dira harremanetan, partiduak lotzeko. Arbitrorik ere ez dute behar: “Denok dakigu noiz huts egin duzun edo noiz egin duzun falta bat. Gatazkak hitz eginez konpondu behar direla uste dugu, eta falta zalantzagarriren bat baldin badago, ba lehenengoa zure alde eta hurrengoa nire alde”, diote jokalariek El Saltoren artikuluan.

“Integrazioa, errespetua, erronka pertsonala, osasuna, sekulako giro ona eta katxondeoa” aipatzen dituzte, ligaren ezaugarrien artean.

Ez dira mota honetako liga kooperatiba bakarra. Alacantekoek adibidez Madrilgo esperientzia hartu zuten eredu. Madrilgoak urte gehiago ditu, eta “udal-liga ekonomikoki abusiboen alternatiba gisa” jaio zen. Kirol merkantilizatu eta elitistaren aurrean, kaleko jolas-lekuak pribatizatzeko joeraren aurrean, “bestelako eredu batean sinesten dugu, zure parean dagoenak inporta duen eredu batean, ez delako soilik saskibaloia, askoz gehiago da”.

“Ez dago genero mugarik, ez muga sozioekonomikorik, eta kaleko kultura du oinarri”

“Denekin partekatzeko espazio bat da gure liga. Ez dago genero mugarik, ez muga sozioekonomikorik. Guztiak dira ongietorriak eta guztien liga da, edonork eman dezakeelako iritzia eta erabaki dezakeelako. Liga kaletarra da, kaleko kultura du oinarri, eta horregatik auzoetako herri mugimendu eta elkarteekin ere badugu harremana”, azaldu dute jokalariek, Madrilgo ligaz egin duten dokumental laburrean.