Sexu bereko gurasoei buruzko dokumentala debekatu du Adingabeen Espainiako Fiskaltzak

Atalak: Diskriminazioa, Haurrak, homofobia

Zur eta lur daude Lidia eta Montse, Madre no hay más que dos dokumentalaren egileak. Haien seme-alabek eskatuta ekin zioten proiektuari: euren egunerokoaz hitz egin nahi zuten haurrek dokumentalean, bi ama izatearen esperientziaz, baina “gai horiez hitz egiteak umeei kalte egin” diezaiekeela argudiatuta, dokumentala debekatu die Adin Txikikoen Espainiako Fiskaltzak.

Hain juxtu, Marc eta Paulak eskatu zieten bi amei dokumentala egiteko, lagunek egiten zizkieten galdera guztiei erantzuteko modua izan zitekeelako. Baina telebistarako proiektu batean umeak agertzen direnean egin behar den tramite burokratikoa betetzera joan, eta ezetz esan die Fiskaltzak, ez dela egokia. “Azaldu diegu umeak besterik gabe euren bizitzaz mintzo direla, baina beraientzat gai delikatuegia da umeen ahotan egoteko”. Helegitea jarri du ekoiztetxeak, baina ez du aurrera egin.

“Jendeari erakutsi nahi diogu familia mota hauek normalak eta naturalak direla, eta goitik esan digute ‘ez, ez dira normalak’. Irudikatu nola gauden”, diote egileek. Debekuaren aurrean, dokumentala Espainiako Estatutik kanpo errodatzea edo telebistarako beharrean interneterako ekoiztea pentsatu dute egileek.