“Ipurdiak garbitzeaz harro nago”

Atalak: Diskriminazioa, Generoa, Zaintza

“Gaur berriz entzun dut ‘lan egin, baita ipurdiak garbitzen ere’, eta ez da ez lehenengo ez zortzigarren aldia entzuten dudana. Eta nire lana aldarrikatzeko beharra sentitu dut, nire lanaz harro nagoela oihukatzeko beharra. Bai, jaun-andreok, ipurdiak garbitzeaz harro, azkazalak mozteaz, buruak garbitzeaz, janzteaz, dutxatzeaz, elikatzeaz eta pertsonak zaintzeaz, bai bai PERTSONAK, euren kabuz moldatu ezin daitezkeenak. Baina laburbildu dezagun ‘ipurdiak garbitu’ horretan”.

Rebeca Vicente Carranzak idatzi duen eta sare sozialetan zabaldu den mezuak garbi azaltzen du berak eta lankideek maiz duten sentimendua. “Apur bat kokoteraino nago esaldi horren konnotazio negatiboez –jarraitzen du–. Argi dago denok ez dugula denerako balio. Nik adibidez ezingo nuke lan egin gezurrak esatera derrigortzen nauen zerbaitetan, bankari edo antzeko zerbaitetan. Baina oso lanbide baloratua da hori, eta nirea aldiz, azkenaren azkena”.

“Orain zuek erabaki zein den lan benetan inportantea”

“Inork zuei ipurdia garbitu behar ez izatea opa dizuet. Baina momenturen batean beharrezkoa balitz, ni edo nire lankideak zuei laguntzeko prest izango gara, bizi-kalitate hobea izan dezazuen, eta umore onez egingo dugu. Orain zuek erabaki zein den lan benetan inportantea. Mesedez, ez erabili ‘ipurdiak garbitu’ esaldia mespretxuz, agian egunen batean norbait beharko duzuelako horretarako, eta eskertu egingo duzue. Sinatuta: Ipurdi-garbitzaile bat”.

Bizkaiko zahar-etxeetako langileei: “Total, lau ipurdi garbitu besterik ez duzue egiten”

Euren lan-baldintzak borrokatzen urtebetetik gora egin dute Bizkaiko zahar-etxeetako langileek, eta eurek ere denetik entzun dute, adinekoen zaintzara dedikatzeagatik bakarrik ez, baita emakume izateagatik ere. Hala azaldu zuten: “Patronalek auzia bizi dute emakume-gizon erasoa bailitzan, ez dute jasaten emakumeak izatea borroka egin eta irabazi dezakegunak. Esaten zaigu soldata txikia dugula, gure senarren osagarri garelako. ‘Total, lau ipurdi garbitu besterik ez duzue egiten’ entzun behar izan dugu. Urtean gai pertsonaletarako lau ordu eskatu eta esan ziguten, ‘zertarako, seme-alabak eskolara eramateko?’”.