Hezkuntza segregazioaz eztabaidatzeko aukera bikaina baztertu du Jaurlaritzak

Atalak: Diskriminazioa, Hezkuntza

Kontsentsua, akordioa, parte-hartzea. Hitz potoloz betetzen zaie ahoa gure agintariei, baina 17.000 sinadurak babestutako proposamena aurkeztu herritarrek, eta Legebiltzarrean eztabaidatzeari ateak itxi dizkio Jaurlaritzak. Eskola-segregazioari aurre egiteko proposamena dakarte herritarrek, zortzi neurri zehatz, egingarri eta zentzuzko. Baina Jaurlaritzak nahiago du aurrerago bere proposamen propioa aurkeztu.

Jaurlaritzak dio EAErako duen Hezkuntza Lege proiektuan jorratuko dela gaia. Herri ekimenaren bultzatzaileak ez dira gehiegi fio: lege proiektuaren argudioa ez dadila izan aitzakia, eskolen arteko desorekari buruzko eztabaida politiko eta soziala luzatu eta atzeratzeko, diote. Gainera, egin duten proposamenarekin Legebiltzarrak bat egiteak “ez lieke kalterik egingo Lege hipotetiko horren edukiei, are gehiago Jaurlaritzak esan duenean gure proposamenaren espirituarekin bat datorrela”.

Gakoa, borondate politikoa

Duela gutxira arte, segregazioa zegoenik ere ukatu egiten zuen Jaurlaritzak: ikastetxeek auzoaren errealitatea islatzen zutela zioen Cristina Uriarte Hezkuntza sailburuak, nahiz eta EAEn maila sozioekonomiko baxuko 10 ikasletik 7k ghetto-eskoletan ikasten duen (eta ez, eskola hauek ez dira auzoaren isla, profil jakineko ikasleak pilatzen dituzten zentro artifizialak baizik). Orain urratsak agindu ditu administrazioak, baina benetako borondate politikoa izango da gakoa, neurriak asmatuak baitaude dagoeneko, eta behin baino gehiagotan errepikatu dituzte eragileek. Nagusienetakoa, matrikulazio bulego edo leihatila bakarra ezartzea –sindikatu eta familien ordezkariak barne hartuko dituena–. Hala, matrikulazioa zentralizatuz gero, ez litzateke ikastetxe bakoitzaren esku egongo, prozesu informalak saihestuko lirateke, eta irizpide ekitatiboak ziurtatzea errazagoa litzateke.

Jarrera “ez oso eredugarria”

Ekintzetatik harago, oso esanguratsuak dira moduak. Herritarren proposamena eztabaidatzeari uko egin eta eskaintza propioa mahaigaineratzea lehenetsi du Jaurlaritzak. Proposamenaren bultzatzaileen esanetan, Jaurlaritzak bere horretan jarraituko balu demokraziarentzat “desmobilizatzailea” eta “ez oso eredugarria” litzateke “herri ekimen legegile bat aurkezteak daukan mobilizazio sozial lan ikaragarria mespretxatzea”. EAErako Hezkuntza Lege berria ere ez da erronka makala eta hor ere kontsentsua, akordioa, parte-hartzea aipatuko digute. Ea benetan hala den.

Irakurri baita ere:

Hesiak elkarbizitzari.

Ghetto-ikastetxeen egunerokoa.