“Pájaros de verano”. Odolak kateatuta

Atalak: Zinemaldia 2018

Tradizio zorrotzak dituen komunitate itxi baina baketsuko kide direla hasiko dute Pájaros de verano filma, eta guztiz suntsitutako familia izango dira amaierarako. Tartean, diru-gosea, pasioa eta mendekua gurutzatuko dira hiru belaunalditan zehar, tragedia handienen gisan.

Kolonbian, klan bereko bi familiak negozio bat hasiko dute elkarrekin, 60ko hamarkada bukaeran: marihuana landatuko dute, estatubatuarrei saltzeko. Pixkanaka, baina, dirua erraz irabazteko aukera zena anbizio eta liskar iturri bilakatuko da. Eta zerbait argi dute klan honetan: odola da inportanteena, familia, eta edozertarako prest daude berau defendatzeko. Bitxia da, arrotz lirudiketen kontzeptuak, tradizio sakratua haustearen kondena, ohore zikinduarengatiko ordaina edota klanarenganako traizioa kasu, zeinen sinesgarri eta gertuko egiten zaizkigun pelikula honetan, gaur egun ere gure hautu indibidualetan kolektiboaren (senideen, ohituren, sinesmenen, gizartearen…) pisua hain da handia, eta hain dira luzeak komunitatearen kateak.

Tonu nobeleskoan, tragedia usaina dario istorioari. Nabarmentzekoa da hizkuntzaren trataera zaindua (komunitatearen identitatean funtsezko), baita pertsonaiak eraikitzeko eta haien bilakaera irudikatzeko Ciro Guerra eta Cristina Gallego zuzendarien lana ere, tartean emakumeek dute rol boteretsu eta erabakigarria.

PERLAK

Pájaros de verano

Zuzendariak: Ciro Guerra, Cristina Gallego.

Gidoilariak: Maria Camila Arias, Jacques Toulemonde.

Aktoreak: Carmiña Martinez, Jose Acosta, Natalia Reyes, Jhon Narváez, José Vicente Cote, Juan Bautista Martinez, Greider Meza.

Kolonbia-Mexiko-Danimarka-Frantzia, 125 minutu.