Athleticeko alebinek 25-0 irabazi dute, eta polemika piztu da sarean

Atalak: Haurrak, Kirola

10-11 urteko haurren norgehiagokan, Athleticeko haurrek 25-0 irabazi diete aurkariei, eta sutu egin da jendea: beharrezkoa da halako gol festa? Ezin dira talde orekatuagoak osatu? Eta zertarako publikatu gol kopurua sare sozialetan? Atlheticen zaleak dira haserre daudenetako asko, eta sare sozialetatik emaitza ezabatzeko eskatu diote beren taldeari.

Emaitza hori azaleratzeak umiliatzeko baino ez duela balio kritikatu du askok, eta hainbatek gogoratu du Galizian adibidez, 12 urtetik beherako haurren partiduetan ez dutela gol kopurua adierazten, baizik eta zeinek irabazi duen edo berdindu al duten (1×2). Errugbian ere ez da markagailua adierazten, eta areago, 20 puntuak gaindituz gero, irabazitzat ematen da partidua eta denbora amaitu arte bi taldeetako jokalariek nahastuta jarraitzen dute jokatzen. Hala jakinarazi du hainbatek, iruzkin andana jaso dituen Athleticen txioari erantzunez.

Zein eredu sustatzen da txikitatik?

Emaitza kaleratzeak baino, emaitzak berak larritu ditu batzuk. Nola da posible halako aldea, halako lehiakortasuna? Galtzaileen ilusioa zapuztetik harago, zertarako hainbeste gol? Ezin al dira talde orekatuagoak osatu, guztien –baita trebeenak direnen– mesedetan? Finean, sakonagoa baita afera: txikitatik zein kirol eredu bultzatzen den, norgehiagokak bere baitan izan dezakeen lehiatik harago kiroltasuna, laguntasuna, taldelana gisako baloreek zein leku duten, lehiaz gaindi hobesten al den kirolaren alde hezitzailea eta ludikoa. Ez al da ba dibertitzea helburu nagusia?

Ez, ez da kasualitatea: oraingoan ere, futbola

Eta ez, ez da kasualitatea futbola izatea lehiaren erreinu: Kirol Justiziaren Euskal Batzordera iristen diren gurasoen arteko liskarrei buruzko instantzia gehien-gehienak, %90 inguru, futbol mundukoak direla esan zigun Dorleta Ugalde Jaurlaritzako Kirol zuzendaritzako kideak, “futbolaren inguruan sortzen den kultura eta espektatibengatik. Jada ez da jokoa, guda moduko bat da”.

Aspaldi esan genuen: noiz uzten dio kirolak dibertsio izateari? Bada, helduak tartean sartzen direnean.