Bitxia, sexu abusuen aurka Gazteluetako zuzendaritzak erakutsi duen “determinazio sendoa”
Gazteluetako irakasle zena kondenatu dute, 12 urteko ikasleari sexu abusuak egin zizkiolako, eta ikastetxeko zuzendaritzak adierazi du “konpromisoa” eta “determinazio sendoa” dutela abusuen aurkako borrokan. Zein konpromiso baina? Sexu abusuak salatu zirenean ikastetxeak ez zuen protokoloa martxan jarri, ikuskariak hiru aldiz hala eskatu zion arren; urteotan irakaslea nabarmen babestu du zuzendaritzak, haren irudia garbitzen saiatu da; eta lazgarriagoa dena, neurriak hartu zituen biktima gezurretan ari zela sinetsarazteko.
Ikastetxeko zuzendaritzatik esan arren garden jokatu dutela uneoro, praktikan irakaslea babestu dute. Gogoratu 25 ikasle eta irakasle animatu zituztela dokumentu bat sinatzera, biktimaren kontakizuna gezurra zela adieraztea beste helbururik ez zuena (dokumentuan baieztatzen zen inoiz ez zutela ezer arrarorik sumatu, erasoak egin ziren bulegoko atea beti zegoela irekita, irakasleak errespetu handiz jokatzen zuela beti ikasle horrekin…). Hala ere, ikaskideetako batek biktimari eman zion arrazoia, besteak beste esanez bulego horretan besteekin baino denbora gehiago ematen zuela erasotzaileak biktimarekin.
Horrez gain, epaiketaren aurretik webgune bat sortu zuen ikastetxeak, berriz ere irakaslearen izen ona defendatu eta ikaslearen bertsioa zalantzan jarriz.
Prozesua kutsatzen
Konpromiso sendoa beste zerbait da. Gutxienez, protokoloa martxan jartzea, benetako ikerketa abiatzea, abusuak salatu dituenari sinesgarritasuna kentzen saiatu ordez haren hitzak ere aintzat hartzea, eta egia argitzeko prozesua kutsatzen ez saiatzea irakaslearen bertsioaren aldeko kanpaina eginez.
“Atsekabetuta” daudela ere badio zuzendaritzaren komunikatuak. Tira, egiaren aitortzak, behintzat, lagunduko al dio ikasle-ohiari ziklo hau ixten. Gertaera haiei lotuta, ez dezagun ahaztu, kanpora joan behar izan zuen familiak, mutila bere buruaz beste egiten saiatu zen eta gaur egun psikologoarenera joaten jarraitzen du.
Ikastetxea ere zigortu beharko lukete protokoloa martxan ez jartzeagatik eta biktimaren aurka egiteagatik
AGINDUA, 2017ko uztailaren 27koa, Hezkuntzako sailburuarena, zeinaren bidez ebazten baita 2017-2018 ikasturterako zehaztu beharreko unitateak xedatzea irakaskuntza hauetarako: deialdi honen arabera ondorengo diru publikoa jaso zuen Gaztelueta ikastetxeak:
HH B eredua 8 gela 517.935,52 euro
LH A erdua 12 gela 813.722,64 euro
LH B eredua 6 gela 406.861,32 euro
DBH I A eredua 6 gela 522.355,56 euro
DBH II A eredua 6 gela 633.572,88 euro
Batxilergoa A eredua 6 gela 640.485,84euro
Itunen bitartez jasotako diruaz aparte deialdi eta aginduen bitarteaz diru gehaigo. Eta holaxe gabiltza, 2019 rako aurrekontuetan sare publikoak igoera bat izango du: 7 greba bitartez lorut da ordezkapenak lehen egunetik eta beste onura batzuk. (baina bueno hori eredu jakobinoa eta estatalista homen da)