Suarekin jolasten duten politikariak eta erretzen diren meskitak

Atalak: Arrazakeria, Xenofobia

Marine Le Pen eta enparauek urteak daramatzate suarekin jolasten, islamofobia hauspotzen, musulmanak eta meskitak kriminalizatzen, baina Fronte Nazionaleko hautagai izan den militar ohi batek musulmanei eraso egin eta burura daramatzate eskuak, asaldatuta. “Gertaturikoa gure alderdiaren baloreen kontrakoa da guztiz”, dio Le Penek, zabaldu dituzten gorroto diskurtsoen atzean ardurarik ez balego bezala.

Koktelak eztanda egin du Baionan: batetik, musulmanak jomugan dituen eztabaida bat (sinbolo erlijiosoak erakusteari buruzko enegarren debatea dute Frantziako Estatuan, bereziki belo islamikoan zentratuta); bestetik, botoen arrantzan islamofobiari zilegitasun osoa ematen dioten politikarien mezuak (zenbatetan entzun ote dugu, “gure baloreak” erasotzera datozela); eta hirugarrenik, militarra izandako ultraeskuindar bat: ondorioa, meskitako atea erretzen saiatu da eta tiro egin die barruan zeuden bi gizoni.

Agintari, hedabide eta erakunde bakoitzak jakingo du zenbateraino lagundu duen arrazakeria elikatzen, gizartea zatitzen, xenofoboen buruak berotzen… baina ez dira loturarik gabeko errealitateak. “Islama eta musulmanak estigmatizatzen dituen egungo giroan, ez da harrigarria halakoak gertatzea”, adierazi du Fede Musulmanaren eskualdeko Batzordeko ordezkariak. “Kezka handia dago hiriko komunitate musulmanean”, gehitu du.

“Musulmanak dira judutar berriak”

Baionako meskitak jasan izan ditu erasoak aurretik. 2017an bi molotov koktel jaurti zituzten meskita barrura, eta 2015ean pintaketa arrazistak egin zizkioten, Charlie Hebdo aldizkariaren aurkako erasoa jazo ostean. “Musulmanak dira judutar berriak; Mendebaldeak mehatxu bezala aurkezten ditu eta diskurtso horrekin indarkeria handiak ari da inkubatzen”, zioen Santiago Alba Rico pentsalariak. Arriskutsua baita suarekin jolastea, badakigu nola bukatzen diren halakoak.