Berrogeialdian seme-alabekin egunez egun osatzen joateko ipuina

Atalak: Haurrak, Haurren haziera, Hezkuntza

Etxetik ezin atera gauden honetan, sormena lantzeko proposamena dakarte Iñaki Sanz-Azkue irakasleak eta Eñaut Aiartzaguena marrazkilariak: hamabost egunez, egunero igoko dute internetera Etxeko leihotik ipuinaren pasarte bat (haurrak pasartearen marrazkia egin dezan) eta pasarte horri lotutako zuri-beltzezko ilustrazioa (marrazkia sortu ordez ilustrazioa koloreztatu nahiago duenarentzat). Jolas moduan egunetik egunera ipuina osatzen joatea eta bide batez irakurmena lantzea da asmoa. Nahi duten haurrek eurek asmaturiko ipuina idatzi eta bueltan ipuin horri propio egindako marrazkia jasotzeko aukera ere ematen du Aiartzaguenak, bestelako material ugari eskaintzeaz gain.

Denborapasak, marrazten ikasteko koadernoa, koloreztatzeko ipuinak… Itxialdi honetan etxeko gazteenak ez aspertzeko material ugari sortzen ari da Eñaut Aiartzaguena eta material berriarekin elikatzen joango da egunotan. Bere webgunetik deskargatu daiteke materiala, etxetik atera gabe (eta etxean inprimagailua izanez gero, paperera eraman daiteke).

Iratiren istorioa, hamabost testu eta hamabost marrazkitan

Iñaki Sanz-Azkuerekin batera abiatu duen proiektua da berezienetakoa: egunero arratsaldeko lauetan Etxeko leihotik ipuinaren zati bat joango dira igotzen, hamabost testu eta hamabost marrazki denera, umeak nahieran landu ditzan (marrazkia gehitu diezaioke testuari, edo Eñaut Aiartzaguenak sorturiko marrazkia koloreztatu). Ipuina egunez egun irakurtzen joan daitezke.

Ipuinak Irati izeneko neskatoaren istorioa kontatzen du: etxean dago itxialdiak behartuta, eta udaberria ate joka den honetan, amorrua eta tristura du ezin duelako naturaz gozatu. Pixkanaka, ordea, etxe inguruko animaliak eta landareak ezagutzen hasiko da, etxe aurrean dagoen zuhaitz zaharrak lagunduta…