Horrela ari dira prestatzen eskolak aire zabalean emateko

Atalak: Hezkuntza, Natura

Jakina da koronabirusa kutsatzeko arriskua leku itxietan baino txikiagoa dela aire zabalean –20 aldiz txikiagoa, Japoniako ikerketa baten arabera–. Aukera baliatzen ari dira hainbat hiritan, ikasturte berrian klaseak kanpora ateratzeko.

New Yorkeko alkateak, esaterako, iragarri du hiriko eskola publiko guztiei eta baita pribatuei ere eragingo diela kanpoan eskolak emateko udalak prestatu duen planak: irakaspenerako patioak baliatuko dituzte ikastetxeek, eta behar izanez gero, aire zabaleko espazio gehiago eskatu ahal izango dute ikastetxeetako zuzendariek, abuztua amaitu baino lehen. Alegia, ikastetxe inguruko kaleak baliatu ahal izango dituztela eta kale horiek eskolarentzat itxiko dituzte, ahal denetan.

AEBetako adibide gehiago ere badira. Portland hirian, arkitektoekin ari dira lanean, ikastetxe bakoitzarentzat gutxienez aire zabaleko bi espazio sortu ahal izateko –eta horretarako eraikin bakoitzak dituen aukerak aztertzen ari dira arkitektoak–. Vermonten, bigarren hezkuntzako ikastetxe batek planteamendu bitxia egin du: ikasleak etxetik arituko dira astean hirutan, eta gainerako bi egunetan eskolaz kanpo ezarritako kanpin dendatan arituko dira. Maine hirian karpa erraldoiak erosten ari dira, Texasen espazio irekiak erabiltzeko aholkatu diete irakasleei instituzioetatik, Seattlen hiriko parkeak erabiltzeko aukera aztertzen ari dira, AEBetako Waldorf ikastetxeen elkartea egurrezko estruktura irekiak eraikitzen ari da bere eskolentzat…

Eskolak kanpoan ematearen aldeko mugimendua handitzen ari da pixkanaka, eta hainbat arkitektok beren burua eskaini dute boluntario, ikastetxeetako patioak eskola emateko nola erabil daitezkeen asmatzen laguntzeko.

Baso-eskolak tradizio handiagoa duen Europa iparraldean ere, hainbat herrialdek kasu egin dio Osasunaren Mundu Erakundearen proposamenari, eta klaseak ahalik eta gehien kalera ateratzen saiatzen ari dira adibidez Norvegian eta Danimarkan. Azken finean, blog honetan kontatu genuen moduan, osasunean bakarrik ez, ikasleen motibazioan eta garapen psikosozial eta emozionalean ere eragin baikorra du aire zabalak, zer esanik ez naturaz inguratutako eremua bada. Hala azpimarratu ohi dute ikerketek.

Irudia: Keith Negley (NBC)