Eskola nola bihurtu LGTB ikasleentzako arnasgune

Atalak: Diskriminazioa, Harremanak, Haurrak, Hezkuntza, Homosexualitatea, LGTBIQ

Zeinen inportanteak diren keinu txikiak, heteronormatik at dauden ikasleek senti dezaten eskola espazio eroso eta segurua dela haientzat. “Gakoa da ikasleei oxigeno bolak jaurtitzea, eredu hegemonikoarekiko kontrakorrontean doazenak”; errealitatea anitza dela erakustea baita bizitza askeagoak izateko lehen urratsa.

1) Hezkuntza-curriculumean, edukietan, ikasgaian erabiltzen diren adibideetan, irakaslearen komentarioetan… kanon heterosexuala da nagusi, heterosexual ez ziren pertsonaia historikoen sexu joera ikusezin bihurtzeraino. Horren aurrean, bestelako erreferente eta ispiluak eskura izan ditzala ikasleak, jende ez heterosexuala ere aipatu dezatela curriculumek, edukiek, adibideek, irakasleen komentarioek. Diskurtso hertsi eta kamustu orokorra gainditzen dutelarik, ikasleentzako oxigeno bolak dira, Kepa Blázquez irakasleak dioenez.

2) Keinu txikien bidez bada ere, genero rolak hausten dituen eta gizon eta emakume eredu zurrunetatik ihes egiten duen irakaslearengandik beste ikuspegi bat jasoko dute ikasleek. Homosexualak diren irakasleak ikasleen aurrean armairutik ateratzea ere inportantea dela diote Kepa Blázquez eta Usua Martinez hezitzaile homosexualek, “eskola identitate sexual guztientzat espazio seguru bilakatzeko bide horretan”. Martinezen esanetan, heterosexualek errepikatu ohi dute ez dagoela armairutik ateratzeko beharrik, ez dagoela dena etiketatzeko beharrik, “baina ez dira konturatzen ezer esaten ez baduzu zuzenean duzun etiketa ‘heterosexuala’ dela”.

3) Ez da inor behartu behar armairutik ateratzera, ikasle bakoitzak bere armairuarekin duen prozesua errespetatu behar da, baina “inportantea da inplizituki ikasleei transmititzea laguntza behar badute hor zaudela”, dio Martinezek, konfidente rola hain da garrantzitsua heldu baten aholkularitza eta babesa behar duen haur eta gaztearentzat.

4) Irain, jazarpen edo gertaera LGTBfoboren bat izan bada eskolan, hartu eta hitz egin. Arazoa mahai gainean jarri eta gaiaz eztabaidatu. Blázquezek gako interesgarria eman digu, halakoetarako: beti biktimaren inguruan, hark sufritutakoaren eta aske maitatzeko eta desiratzeko duen eskubidearen inguruan zentratu beharrean, alda dezagun fokua erasotzailearengana: “Diskurtsoa bideratu beharko litzateke norbere homofobia lantzera eta desaktibatzera”.

5) Egunerokoan oxigeno bolak jaurtitzeaz gain, gaiari sakon heldu eta ikastetxeetan sexu heziketa jorratzea ezinbestekoa da, galdera, zalantza eta kezkak argitzea, dagoen errealitate zabala azaltzea.