Sexu zikina

Atalak: Homosexualitatea, Sexua

Gizonen arteko sexu harremanak praktika ilun, kontrolgabe eta arriskutsuekin lotzen ditu gure iruditeria kolektiboak, ez alferrik urtetan elikaturiko estigma izan da maritxuen sexualitatea, gizon askok barneratzeraino norbere desira zerbait zikina, erdeinagarria eta lotsatzeko modukoa dela. Iruditeria horri bazka ematen jarraitzen dugula erakutsi dute Bilbon berriki izandako hilketek.

Iruditeria kolektiboan hedabideek duten pisua handia da, eta Bilbon aplikazio bidez hainbat gayrekin hitzordua egin eta hil egin dituen gizonaren kontakizunean, komunikabide batzuek afera baliatu dute morboan sakontzeko, kasik iradokiz sexu grinak eta harremanak egiteko modu horrek eraman dituela biktimak heriotzera. “Ezezagun batekin sexu harremanak izateagatik” halakoak gertatzen direla irakurri diogu bati baino gehiagori sare sozialetan, berriz ere harreman homosexualak arriskuarekin (drogekin, deprabazioarekin…) lotuz –hiesarekin hala egin zuten eta orain ere tximino-baztanga birusa sexu praktika gayekin lotu du hainbat hedabidek arduragabeki, harreman homosexualen gainean arriskuaren zama pisutsua erreproduzituz–. Noiz uzten dio baina ezezagun batek ezezagun izateari, harekin sexu harremanak eduki ahal izateko? Bilboko kasuan ligatzeko aplikazioak izan dira eztabaida-iturri, baina cruisinga kritikatzen denean bezalatsu, inplizituki harreman homosexualak epaitzea eta homofobia hauspotzea izan da jomuga, harreman heteroetan denetik ez balego bezala.

Halako aplikazioak gauza ederra dira gainera, etxeko sofatik ligatzeko, inguru heteronormatibotik ihes egiteko, armairuan jarraitzen duenak alternatiba bat izateko, esperimentatzeko… Zenbaitek sexua soilik ulertzen duela ezkutuan eraman beharreko kondena gisa? Batzuentzat sufrimendutik eta erruduntasun eta lotsa sentimenduetatik gehiago dutela hitzordu klandestinoek, gozamenetik baino? Harreman mingarria dutela euren sexualitatearekiko? Jakina halakorik badela, jakina estigma barneratua duen jendea dagoela, baina praktika homosexualak epaitzen, moralizatzen eta sexua erromantizatzen aritzeak ez die ezertan laguntzen. Gozamen iturri diren sexu praktika oro naturalizatzeak izan behar luke bidea, gure sexualitateak eta sexu praktikak modu askeagoan eta osasuntsuagoan bizi ditzagun.