Komun publikoak bermatzea ere feminista da

Atalak: Feminismoa

Bi komun eramangarri baino ez zeuden Lilatoia lasterketaren irteera eta helmuga gunean –dirudienez, gainera, ez espresuki lasterketagatik jarriak–, eta parte hartu zuen emakumeetako baten kexa iritsi zait: gizonak, arrazoi anatomiko eta kulturalak medio, edozein zuhaitz eta txokotan pixa egiten ikustera ohituta gaudela, baina 6.000 emakumeren behar fisiologikoak aintzat hartu beharko lituzkeela ikuspegi feminista duen korrikaldiak. Gaiak eztabaida zabalagoa dakar erdigunera: zein leku dute komun publikoek gure herri eta hirietan?

6.000 lagunentzako bi komun aurreikusteak ez dirudi oso proportzionala. Argazkia: El Diario Vasco

Ariketa fisikoak tripak mugitu ohi dituela ez da gauza berria. Lilatoian korri egin duen emakume honek adierazi dit erditu duten emakumeek edota menopausian direnek pixari eusteko zailtasun handiagoak izan ditzaketela. 6.000 lagunentzako bi komun aurreikusteak ez dirudi oso proportzionala –hiriguneko aparkalekuak lur azpian komunak dituela ez zitzaien ohartarazi korrikalariei– eta agian zerikusia du beste lasterketetan gehiengoa gizonak direla eta komunak ez direla lehentasun, maskuria bestela ere hustuko dutelako –horretaz ere zabal hitz egin genezake…–.

Kontuak kontu, fokua irekitzea merezi du aferak: hirigintza planetan, zein leku dute komunek espazio publikoan? Nahikoa al dira kopuruari eta kokalekuei dagokienez –ala taberna batean kontsumitzea egokitu zaizu sarri, komunera joan ahal izateko–? Doakoak, zainduak, garbiak eta herritar guztientzat irisgarriak eta egokituak al dira komun publikoak? Aintzat hartzen al dute aniztasun funtzionala duen jendea? Hilekoa jaisten den egunetarako prestatuta al daude? Gizon nahiz emakumeek umeari pardela aldatzeko aukera ematen al dute?… Komunen irisgarritasuna eta baldintzak aztertu zituen Clara Greed hirigile feministak ozen aldarrikatu zuen: “Kakari garrantzia eman behar diogu”, gure herri eta hirietako komun eredu nagusia patriarkala, kapazitista eta kapitalista dela salatzen baitzuen.