Kirola, gizonen kontua

Atalak: Kirola, Matxismoa

Padel ikastaroan izena ematera joan da 40 urte dituen Laura, bere mailan ordu bakarra dago libre, baina bi gizon daude izena emanda ordu horretan “eta gizonekin ez zaitut jarriko, zeren gizonek neurria segituan hartzen diote jokoari”.

Laura ahozabalik geratu da, baina momentu horretan ez du erreakzionatu, harrerako gizonak esan dio ikastaroan parte hartu ez baina mugikorrerako daukaten aplikazioaren bidez maila bereko jendearekin harremanetan jar daitekeela, jokatzeko, eta halaxe egin du Laurak. Hitzordua jarri du maila berean izena emanda dauden (0-tik 5-era, 1 mailan) hiru ezezagunekin: bi emakumek jokatu dute, bi gizonen aurka; bada, emakumeek gizonak 6-0 eta 6-0 garaitu ostean, bikoteak aldatu egin dituzte, norgehiagoka orekatzeko.

Anekdotatik harago, aurreiritzi kezkagarria azaleratu du harrerako gizonak. Ohituta gaude gizon eta emakumeen zenbait gaitasun fisikoren inguruan eztabaidatzera –eta adin batetik aurrera mutilak eta neskak elkarrekin jokatzea onuragarria den ala ez eztabaidatzera–, baina indar erakustalditik urrun ezer baino gehiago teknikoa den padel kirolean, harago jo du ikastaroen antolatzaileak: bilakaera ere hobea omen dute gizonek, ariketa fisikorako eta kirolerako dohain berezia, teknika berenganatzeko gaitasun handiagoa, per se.

Laburrean, argi utzi du oraindik ere askoren iruditeri kontziente edo inkontzientean dagoen pentsamendua: kirola gizonen kontua da. Bai, emakumeek egin dezakete kirola, baina kirola hizki larriz gizonen kontua da. Ikastaroa mailaren arabera sailkatuta badago, zein zentzu du maila horren barruan ere bereizketa egiteak? Kirol parte-hartzailea nahi omen dugu, emakumeen kirolarekiko zaletasuna handitu… baina aurreiritziek pisu handiegia dute oraindik ere.