7 urteko mutilak bazter ikusten du bere burua eskolan, futbola gustuko ez duelako. Zer egin?

Atalak: Generoa, Haurrak, Hezkuntza, Jolasa, Kirola

Ikerrek 7 urte ditu eta sentitzen du eskolan bakarrik geratzen ari dela, bere adineko gainerako mutilek futbolean jokatzen dutelako jolas-garaian. Futbolak duen gehiegizko protagonismoari aurre egiteko estrategia bideratu nahi du ikastetxeak, eta gaia landu duten eskolen esperientzia eta ereduak bildu nahi ditu horretarako.

Zein leku izan behar du futbolak eskolan?(Argazkia: Footycomimages Openverse)

“Baloirik gabeko eguna(k)” orokortu egin dira ikastetxeetan, eta patioa eraldatzeko proiektuetan ere, futbolzentrismoari aurre egitea izan ohi da helburuetako bat. Futbola mugatzearen aurrean dauden erresistentziak, baina, ez dira gutxi, Kurutziaga ikastolako patioaren eraldaketan kontatu dugunez.

Ikerren ikastetxean gaia jorratu nahi dute, eta eskertuko dute beste eskoletan aurrera ateratako esperientziak partekatzea (iruzkina utzi dezakezue, edo mgarcia@argia.eus-era idatzi). Ikerren ama Maitek azaldu digunez (izenak aldatu dizkiegu), “jolas librea mugatu gabe, eskoletako patioetan gertatzen diren dinamiketan eragiteko gaitasuna dugula uste dut, eta hezitzaile eta irakasleei dinamika batzuk sustatu edota oztopatzea dagokiela: nola eragin, inor ez dadin baztertuta gelditu? Zer eskaini, neska-mutilek elkarrekin eta berdintasunez jolastu dezaten?”. Azken finean, mutil guztiei futbola gustatzea ezinezkoa dela abiapuntu hartuta, zergatik dabiltza (ia) denak futbolean? Ze presio, mekanismo eta dinamika daude atzean?

“Jolas librea mugatu gabe, hezitzaile eta irakasleei dinamika batzuk sustatu edota oztopatzea dagokie”

Maitek gehitu du azken egunetan semea askoz hobeto ari dela egoera eramaten, mutil ikaskide batzuk futbola ez beste jolas batzuetan murgildu direla, baina gogoetarako deia egin du: “Arazoa ez da kirola bera, baizik eta kirol horrek gure gizartean duen esanahia, eta ondorioz, haurren artean sortzen duen dinamika. Edozein kirol ez da neutroa, gure gizartean txertatuta dago, eta balore eta konnotazio batzuk ditu atxikita. Futbolaren kasuan, eliteko eredu komertziala da haurrek imitatzen dutena, maskulinitateari eta lehiakortasunari oso lotua. Gure gizartean, mutikoa bazara, futbolean ona izateak ez dauka beste kirol batean ona izateak dituen konnotazio eta ondorio berdinak”. Ildo horretan, futbol trebeziari lotuta “haurren arteko desoreka oso handia da, eta horrek haurren arteko botere harremanak eta bazterketak areagotzen ditu. Kirolaz modu parte-hartzaile eta hezitzailean gozatzeko, eta haurren artean harreman osasuntsuak eraikitzeko, garrantzitsua da kirol bakoitzak sortzen dituen dinamikak aztertzea, eta horrek dituen ondorioak baloratzea”.

“Arazoa ez da kirola bera, haurren artean sortzen duen dinamika baizik”

Zein leku izan behar du futbolak eskolan? Nola sustatu bestelako jarduera ludikoak eta aukera aniztasuna jolasetan? Eredu positiboak lagungarri izango dituzte Ikerren ikastetxean.