Otzan nahi gaituzte

Atalak: Ekonomia, Gizartea

Bilbon astelehenean egindako Foro Globalak manifestazio erraldoia eta zenbait kale istilu eragin zituen. Indarkeria legitimatzeko asmorik gabe, bi hausnarketa istiluon harira.

Milaka herritar elkartu zirela da nire irakurketa, Euskal Herrirako eredu ekonomiko eta politiko propio eta egokiago bat aldarrikatzeko (Argazkia: Axier Lopez)

Ez al da sekulako probokazioa, bizi ditugun garaiotan, elite politiko-ekonomiko europar eta espainolak etortzea, zer eta elite horretan ez gaudenoi esatera langileen eskubideak zanpatzen dituen lan erreforman sakondu beharra dagoela, merkatu malguagoa (irakur bedi prekarioagoa) behar dugula, gizarte kotizazioak murriztu behar direla…? Eta probokazio horren aurrean, herritarrok protestarik ez egitea nahi dute, edo egitekotan, protesta isilak izatea, molestatuko ez dutenak, hiritar zintzoei eta agintariei enbarazurik egingo ez dieten protestak (eta eraginik eta oihartzunik izango ez dutenak); ezarritako agindu politiko-ekonomikoei men egingo dieten herritar otzanak nahi dituztelako (LOMCEk dakarkigun hezkuntza ereduak zer nolako herritarrak sortu nahi dituen ikustea besterik ez dago).

Bestetik, kale istiluekin asaldatu diren hedabide eta politikariek aipatu al dute bestelako eredu ekonomiko baten alde mobilizazioek bildu zuten eragile eta herritar andana? Aipatu al dute zenbateraino diren kriminalak osasun zerbitzuak eskasten dituzten, jendea etxetik botatzen duten edo zerbitzu sozialak murrizten dituzten Troikaren neurri neoliberalak? Demagogia egiten ari naizela? Demagogikoagoa iruditzen zait sakoneko arazoari heldu beharrean istiluetan baino ez jartzea arreta.

Berrogeita hamar bat eragile sozial eta sindikal, eta milaka herritar elkartu zirela da nire irakurketa, burujabetzaren bidean, Euskal Herrirako eredu ekonomiko eta politiko propio eta egokiago bat aldarrikatuz.