Hilda agertzen diren emakumeak

Atalak: Gizartea

Erailketa eta indarkeria matxistaren berri ematerakoan, badugu zer hobetu hedabide eta kazetariok:

Justifikazio (in)kontzienteek maitasun/erromantizismo kontzeptu ustel bat betikotzea eta benetako arazoa ezkutatzea baino ez dakarte (Irudia: Carlos Latuff)

– Ez delako gertakari isolatu eta pribatu gisa jorratu behar. Arazo politiko eta sozial batek (berdintasun ezak) eragin duen heinean, biktima politikoak dira.

– Justifikazio kontziente/inkontzienteak erabiltzeak (alkohola, drogak, langabezia, zeloak, pasioa, bien arteko eztabaida bat, bat-bateko erokeria…) hiltzailea/hilketa zuritzea, maitasun/erromantizismo kontzeptu ustel bat betikotzea eta sakoneko arazoa ezkutatzea baino ez dakarrelako.

– Biktima/hiltzailea etorkinak direla edo giro eta auzo jakinetan bizi direla azpimarratzeak ahaztarazi diezagukeelako maila sozio-ekonomiko guztietan eta Euskal Herri osoan bizi dugula indarkeria matxista.

– Hiltzailea beharrean biktima jartzen dugulako sarri jomugan, gertatu zaiona probokatu izan balu bezala (salaketarik jarri ez zuela azpimarratzen denean, adibidez. Edo beste molde batean, nola ahaztu herri-epaimahaiak Nagore Laffageren amari alaba “oso mutilzalea” –muy ligona– al zen galdetu zionekoa?).

– Emakumea ez delako “hilda agertu”. Gizon batek hil du, eta indarkeria matxista da arrazoia. Terminologia ere garrantzitsua baita.

– Kutsu morbosoa duten datu, irudi eta adierazpen hutsalak baino ekarpen handiagoa direlako testuinguruan (hots, benetako arazoan) kokatzen, kontzientzia kritikoa garatzen, eta diskurtsoa indartzen eta zabaltzen lagunduko duten analisi, iritzi-artikulu eta elkarrizketak. Behar diren neurri, estrategia eta politikak proposatu eta eskatuko dituzten artikuluak nahiago, gertatu dena jarrera pasiboz kontatzea baino.

– Albistea ez delako amaitzen hilketa horren berri emanez, urte osoan jorratu beharreko gaiak baitira sexu eta genero diskriminazioa, baita (emakumeak beti biktima, beti ahul, erakutsi ordez) emakumeen eta borroka feministaren lorpenak ere.

– Aurreko guztiaren oinarrian dagoena barneratzea delako abiapuntua: arazo estrukturala dela indarkeria mota hau, gizonak emakumearenganako biolentzia-posesio-kontrol-nagusitasun jarrera izatera eramaten duen berdintasun desoreka izugarria dagoela atzean, eta horregatik, hilketa bakoitzaren aurrean harritu eta asaldatu beharrean, izebergaren puntan geratu beharrean, muinari heltzea komeni dela.