Jaitsiera mutua infernuetara

Atalak: Zinema, Zinemaldia 2014

“Ez dut zertan hau jasan” esan nahian bezala, lauzpabost ikusle aldi berean atera dira zine-aretotik, The Tribe film ukrainarraren unerik gordin eta deserosoenetakoan. Zinema beti ez baita erosoa, atsegina eta polita. Bizitza bezalaxe.

Protagonista nerabe gormutuentzako barnetegi batera iritsiko da, eta berehala ikasiko du bertan bizirauteko arau nagusia: oihanaren legea, indartsuenaren legea. Lapurreta, ustelkeria, prostituzioa, borroka, tortura, hilketa… In crescendo egingo du gazteak infernuetarako bidea, atzera bueltarik gabe, taldetik kanpo ez baitago bizirauterik. Basatia da Slaboshpytskiv zuzendariaren lana, gordina, brutala, inor epel utziko ez duen istorioa. Pertsonaia gormutuz osatua, ez da hitz bakar bat ere entzuten pelikula osoan zehar, zeinu hizkuntzan ari dira elkarren artean, baina indar handiz transmititzen zaizkio ikusleari pertsonaiei darien gorrotoa, amorrua, mina, maitasuna, ezintasuna… Eszena batzuk luzexkak egin zaizkit, beste batzuek aldiz harrapatu egin naute, eta batez ere, esperientzia bat izan da soinu-bandarik eta hitzik ez duen filmean isiltasunak, pauso-ate-kolpe hotsek, inguruko soinuek… duten intentsitateaz jabetzea.

Esperientzia bat delako The Tribe, barruak mugitzen dizkizuna, astintzen zaituena. Ez, ez da lan eroso, atsegin eta arina, eta beharbada horrexegatik, aurtengo Cannesko Kritikaren Astean garaile erabatekoa izan da.

ZABALTEGI PERLAK

Plemya / The Tribe

Zuzendaria eta gidoilaria: Myroslav Slaboshpytskiy.

Aktoreak: Grygoriy Fesenko, Yana Novikova, Rosa Babiy, Alexander Dsiadevich.

Ukraina, 132 minutu.