Entretenigarria… baina aukera galdua

Atalak: Zinema, Zinemaldia 2014

Pablo Escobar narkotrafikatzaile ospetsua, eta Benicio del Torok berau nola irudikatu duen ikustea dira Escobar: Paradise lost pelikularen amu zinematografiko eta komertzial nagusiak. Baina ze pena, bigarren mailako pertsonaia da Escobar, pelikulako gaizkilea, eta hain figura konplexu eta interesgarrian sakontzeko, Kolonbiak izan duen gatazkarik garrantzitsuenetakoan barneratzeko aukera aparta galdu du filmak.

Politikari populista, Medellingo droga kartel inportantearen burua, behartsuen “salbatzaile” eta hainbaten mito, Kolonbiako Gobernuaren kontra gerra abiatu eta atzean odol ugari utzi zuelarik, espetxeratua izan zen, eta ihes egitea lortu zuen ondoren. Hori dena izan zen eta egin zuen Escobarrek, eta hainbat pasarte ageri dira istorioan, zeharka; pelikulan, Benicio del Torok ongi antzezturiko mafiosoa da Pablo Emilio Escobar Gaviria, Jainkoaren gainetik dagoena, batzuetan Marlon Brandoren Don Vito Corleone gogorarazi didana, eta batzuetan ñabardurak falta zaizkion estereotipo bihurtua. Kolonbiaz ematen den irudia bera baita estereotipatua, protagonistaren begiradatik eraikia. Eta nor da protagonista? Bada, Nick, Kolonbiara iritsi eta Escobarren ilobarekin maiteminduko den surflari kanadiar gaztea, Jorsh Hutchenson aktoreak antzeztua (orain bogan, The Hunger Games saga dela-eta). Pixkanaka, Escobarren familian eta munduan nahi baino gehiago barneratuko da Nick, eta ihes egin nahi duenerako, beranduegi izango da.

Akzioa eta thrillerra nahasten dituen pelikula entretenigarria da Escobar: Paradise lost, komertzialki ongi funtzionatu dezakeena, baina ze pena, aukera aparta galdu du Andrea Di Stefano zuzendariak.

ZABALTEGI PERLAK

Escobar: Paradise lost

Zuzendaria eta gidoilaria: Andrea Di Stefano.

Aktoreak: Benicio del Toro, Josh Hutcherson, Claudia Traisac, Brady Corbet, Carlos Bardem, Ana Girardot.

Frantzia-Espainia-Belgika, 119 minutu.