Euskalfobia ikasgeletara darama UPNren estrategia politikoak

Atalak: Hezkuntza

UPNk irakaskuntza publikoan egin dituen murrizketa bortitzak eta hainbat ikastetxetan dituzten azpiegitura arazoak, ingelesez ikasteko martxan duen PAI proiektu txapuzeroa (diseinatu zuen taldeak dimisioa aurkeztu du dagoeneko) edo LOMCE legeak eragingo dituen lardaskeriak ez dira kezka iturri José Iribas Nafarroako Hezkuntza kontseilariarentzat.

Iribas kontseilaria, testuliburuetan Euskal Herriko mapa ageri dela salatzen.

Beste bat da UPNren obsesioa: euskalfobia larria dauka eta berriak ez zaizkigun diskurtso eta mehatxuei ekin die beste behin, ikastetxeetan “Nafarroaren errealitate instituzionala” (UPNren araberako errealitatea, jakina) ez ei delako errespetatzen, eta eskoletan erabiltzen den zenbait material “doktrinatzailea” delako (UPNren doktrinarekin bat egiten ez duena, alegia). Oraingoan, ekintzetara pasa eta legea ere egingo du Nafarroako Gobernuak, Euskara eta Literatura ikasgaiko 22 liburu erretiratzeko, eskoletara ikuskatzaileak bidaltzeaz (eta behar izanez gero espedienteak irekitzeaz) gain.

Izan ere, UPNren obsesio eta fobiak oso kalkulatuak dira, kanpaina politikoa egiteko primerakoak: “Badatoz euskal abertzaleak Nafarroa –eta gure seme-alabak– konkistatzera!”. Maiatzean dira hauteskundeak, eta identitate nabarrista atzerakoi eta espainolzaleenaren babes gisa aurkeztea du arma nagusi, ohiko mamu eta beldur ustelak haizatuz, gero eta irudi narriatuagoa duen Gobernua boterean mantentzeko. Bitartean, Iribas jaunak hainbeste defendatzen duen hezkuntzak murrizketen, PAIren, LOMCEren eta utzikeriaren menpe jarraituko du Nafarroan.