Haurdun geratzen direnak legez babestea akatsa da, Espainiako Enpresarien Elkarteko presidentearen esanetan

Atalak: Ekonomia, Gizartea

“Emakume bat haurdun geratzen bada eta arrazoi horregatik umea izan ondorengo 11 urteetan ezin bazaio lanetik kaleratu, nor kontratatuko du enpresariak? Nahiago dut 45 urte baino gehiago edo 25 baino gutxiago dituen emakumea kontratatu, bestela, zer egingo dugu arazoarekin?”, adierazi du berriki Mónica de Oriol Espainiako Enpresarien Elkarteko presidenteak.

“Emakume batek, zuzendaritzako postu batera iristeko, edo funtzionario batekin ezkondu behar du, edo umeak oso gustuko dituen senarra izan behar du”.

Emakume batek, “zuzendaritzako postu batera iristeko, edo funtzionario batekin ezkondu behar du, edo umeak oso gustuko dituen senarra izan behar du”, gaineratu du Oriolek. Hitzok pizturiko polemika handiaren ostean, presidenteak esan du ez dela ondo ulertu berak esandakoa, emakumea babesten duten legeak direla gaizki ikusten dituenak, berdintasunaren izenean kontratua “11 urtez blindatzeak” eragiten duelako emakumea “enpresaren interesetatik eta eguneroko esfortzutik aldentzea”, ondorioz produktibitatea jaistea, bere ibilbide profesionalean aurrera ez egitea eta enpresariak emakumerik kontratatu nahi ez izatea.

Haurraren zaintzarako lanaldi murriztuaz ari da Oriol: langileak lanaldi murriztu hori eskatzen badu, orduan ezingo baitu enpresariak kanporatu, baina hori aitak nahiz amak eska dezake, emakume nahiz gizon. Gainera, zergatik ondorioztatu du Oriolek botako ez dutela dakien langileak produktibitatea jaitsiko duela? Lanean kolokan egon beharrean ziur, eroso eta gustura dagoen langileak ez al ditu emaitza hobeak eskainiko? Benetan uste al du emakume baten ibilbide profesionalarentzat onuragarriagoa dela haurdun geratzen denean enpresaburuaren interesen esku uztea haren etorkizuna?

Azken finean, langilearen eskubideak babesteko eta hain juxtu seme-alabak izateagatik inor ez diskriminatzeko neurriak dira legeak zehazten dituenak, eta emakumeek profesionalki aurrera egiteko lege horiek oztopo direla esateak, lege horien erruz emakumeak zuzendaritza postuetara iristen ez direla baieztatzeak zinikoa dirudi, batez ere kontuan hartuz sei seme-alaba dituela Oriol enpresaburuak.

Gutxienez, kontziliazioaren eta zaintzaren gaia lehen planora ekartzeko balio izan du albisteak.