Mikel Moore bat behar du Euskal Herriak

Atalak: Zinema

Sicko pelikularen irudia.

Fitxa teknikoa: Sicko, zuzendaria: Michael Moore. Dokumentala. 123 minutu. AEB, 2007.

Osakidetzako trapu zikinak azaleratuko dituen dokumentalgilea behar dugu, itxaron gelan dauden gaixo aspertuak elkarrizketatuz, paziente bakoitzarekin denbora gehiago eskatzen duten 10 Minutu Plataformako medikuekin hitz eginez, ebakuntzaren zain itxaron zerrenda amaigabeetan daudenen inguruan dokumentatuz, benetan premia izan duenean osasun pribatura jotzea beste erremediorik izan ez duen jendeari galdetuz.

Dena den, kontsolamendua ere bada ikustea datorren hil bukaeran Hego Euskal Herrian estreinatuko den Sicko filma, Michael Moore polemikoaren azkena. Izan ere, beldurgarria da AEBetako osasun sistemaz eskaintzen duen irudia. Aseguru etxe handien esku dago estatubatuarren osasuna –zehazkiago asegurua dutenena, 50 milioi biztanle osasun asegururik gabe bizi baitira–, konpainien azpijokoen esku: dolar gehiago irabazteko aseguratuak hiltzen uzten dituzten medikuak, diru truke txintik esaten ez duten politikariak, eta kasu lazgarriak pairatu behar dituzten gaixoak.

Doako osasun unibertsalari beldurra dio oraindik estatubatuar askok, agintariek ondo jakin baitute sozializazioaren mamua zabaltzen, mediku pribatuek sei zifrako soldatak kobratzen jarrai dezaten. Hain zuzen, dokumentaleko une batean hainbat gaixo txalupan sartu eta Kubara eramango ditu Michigango zuzendariak, han tratatu ditzaten. AEBetan kasik hirugarren munduarekin lotzen duten herrialde komunistan osasun zerbitzu hobea dutela frogatzeak bat baino gehiago zirikatuko zuen kapitalismorik basatienaren lurraldean, ziurrenik.

Osasunaren Mundu Erakundearen datuetan erreparatuz gero, ikusiko dugu AEBetako osasun sistema munduko 37. postuan dagoela, eta haur heriotza tasan, adibidez, munduko 44. posturaino jaitsi dutela. OMEren arabera, “edozein indize objektibo kontuan hartuz, AEBen osasun sistema bigarren mailakoa da”, askorentzat munduko herrialderik aurreratuena den arren.

Kontuak kontu, hainbat taldek “AEBen etsai” izendatu duten Michael Moore zuzendariak hautsak harrotu ditu berriz ere. Bowling for Columbine (arma industriaz) eta Farenheit 9/11 (Irakeko gudaz, inoizko dokumentalik ikusiena) ezagunetan egin zuen antzera, Bushen administrazioa astintzea lortu du beste behin, eta probokazioaren bidez, normaltzat ematen diren ereduak zalantzan jartzea. Ikusi beharko da Obamaren Gobernuak kritikarako hainbeste aukera ematen duen.

Eta bukatzeko, ez gaitezen ahaztu, berriro diot: Moore euskalduna behar dugu guk, elkarte gastronomikoetan arakatuko duena, hezkuntza sisteman, ogasunean, kultur politikan, banketxeetan, inertziaren indarrez ontzat ditugun moldeak hankaz gora jartzeko.

Informazio gehiago:

• Sicko
• Michael Moore
• Farenheit 9/11
• Bowling for Columbine
• Osasunaren Mundu Erakundea-AEBko datuak