Kultura gozatu, baloratu, lagundu

Atalak: Kulturgintza

Kultur emanaldi libre eta irekiak antolatzen dituzte Irungo Kabigorri Ateneo-tabernan. Ugaria eta anitza da eskaintza, kontzertuak, antzezlanak, literatur irakurraldiak, erakusketak, bertso-saioak, hitzaldiak… tarteko. Bide Ertzean, Mursego edo Itxaro Borda bezalako izen ezagunekin batera, artista ezezagunek ere tokia dute bertan.

Kultura doan ikusteko aukera izateak, ordea, ez du esan nahi kultura doakoa denik. Sustengatu eta finantzatuko duenik behar da, eta horren jakitun, baina aldi berean kultura denoi irekita egon behar duela ulertuz, ohar interesgarria zabaldu du Kabigorrik, Sarrera libre. Kanpoan, konponduko gara!! lelopean.

“Kabigorrin, beti izan da doan eta libre ikuskizunetara sartzea, eta horrela izaten jarraitzea nahi dugu –dio oharrak–. Baina horretarako, aldaketaren bat egin beharra daukagu, ikuskizun bakoitzaren amaieran borondatezko ekarpena egiteko sistema bat proposatzen dizuegu. Erabat borondatezkoa izango den ekarpen horrekin, laguntzeko aukera eman nahi diogu Ateneoa eusten lagundu nahi duenari, baita gozatu duen produktu artistikoaren balioaz gogoeta egiteko ere. Badakizue, lehenengo gozatu, gero baloratu, eta hirugarrenik, diru-ekarpen bat eginez lagundu”.