Zer da ama izatea?

Atalak: Gizartea

Amaren Eguna izan berri da Hego Euskal Herrian. Ama izatea da, ipuinen arabera, emakume bezala asebeteta sentitzeko funtsezko baldintza; anti-abortisten iritziz, betebeharra; gure iruditerian, seme-alabari maitasun eta babes amaigabea eskainiko dion pertsona, betirako hari lotuta –eta haren menpeko–, irribarretsu eta apal, ordainetan ezer eskatzen ez duena; datuek diotenez, umeen zaintzaz arduratzen dena, lan-ibilbideari –eta aisialdiari– uko egiteko prest dagoena edo kontziliazioan sakrifizio gehien egiten dituena; psikoanalistei kasu eginez gero, umeek (eta are, helduek) dituzten jokabide txar eta frustrazioen errudun nagusietakoa; iragarkien arabera, umeak hezi bitartean exekutibo izateko, etxeko lanak egoki betetzeko, lirain mantentzeko, egunero umore onez jaikitzeko eta uneoro dotore agertzeko kapaz diren emakumeak; eta gizartearen ikuspegitik, ama onak eta txarrak daude, eta denok ditugu gure irizpide propioak hori erabakitzeko, epaitzeko, presionatzeko, kondenatzeko.

Beharbada, Amaren Egunean ideia ona litzateke, lore sorta oparitzeaz gain, ematen dizkiegun rol horiei guztiei buruz esateko dutena arretaz entzutea.